ឡិចស៊ីស RX300 បុកម៉ូតូដឹកឈាមគោ បែកឈាមប្រឡាក់ពេញផ្លូវ
ភ្នំពេញ ៖ កាលពីវេលាម៉ោង ៤និង៤០នាទីទៀបភ្លឺថ្ងៃទី៨ មករា រថយន្តមួយគ្រឿង បត់ឆ្វេងបុកម៉ូតូដឹកឈាមគោ ២ប៊ីដុង ធ្វើឲ្យអ្នកបើកម៉ូតូ ខ្ទាតចូលក្រោមរថយន្តមួយគ្រឿងទៀត ចតនៅចិញ្ចើមផ្លូវមុខធនាគារអេស៊ីលីដា ឲ្យបែកឈាមគោប្រឡាក់ពេញថ្នល់ និងរថយន្តចតស្ងៀមនោះ ស្មានតែមនុស្សស្លាប់បាត់ ស្ថិតនៅមុខធនាគារអេស៊ីលីដា តាមមហាវិថីព្រះមុនីរ៉េតកែង២១៣ ក្នុងសង្កាត់វាលវង់ ខណ្ឌ៧មករា ។
ប្រភពព័ត៌មាន បានឲ្យដឹងថា មុនពេលកើតហេតុរថយន្តឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2Q 3958 បើកតាមមហាវិថីព្រះមុនីរ៉េត ពីលិចទៅកើត ចំណែកម៉ូតូគុបមូល ពណ៌ទឹកប៊ិច ដឹកឈាមគោ២ប៊ីដុង ពីជ្រោយចង្វារយកមកឲ្យម៉ូយ នៅផ្សារដើមគ ជិះកើតទៅលិចក្នុងទិសដៅបញ្ច្រាសទិសគ្នា ខណៈមកដល់ចំណុចផ្លូវកែង រថយន្តបត់ឆ្វេងទៅបុកម៉ូតូដឹកឈាមគោ ធ្វើឲ្យខ្ទាតឈាមគោប្រឡាក់ពេញផ្លូវ និងខ្ទាតទៅលើរថយន្តតូយ៉ូតាមួយបាំងកន្លះ ពណ៌ស ចតនៅ មុខធនាគារអេស៊ីលីដា ចំណែកអ្នកបើកម៉ូតូខ្ទាតចូលក្រោមរថយន្តនោះ របួសបាក់ជើងឆ្វេង។
ក្រោយពេលកើតហេតុ អ្នកឃើញហេតុការណ៍ឃើញឈាមប្រឡាក់ពេញផ្លូវបែបនេះ ស្មានតែជនរងគ្រោះស្លាប់បាត់បង់ជីវិតទៅហើយ តាមពិត ឈាមប្រឡាក់នោះ ជាឈាមគោទេ ។ ជនរងគ្រោះ ត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន ចំណែកម៉ូតូត្រូវសមត្ថកិច្ចលើកយកទៅរក្សាទុក នៅខណ្ឌ ៧មករា ៕