កម្ពុជា-ថៃបន្តពង្រឹងកិច្ចសហប្រតិបត្តិការ
ភ្នំពេញ៖ នៅថ្ងៃទី០២ ខែមករា ឆ្នាំ២០១៣នេះ ប្រមុខការទូតកម្ពុជា និងថៃបានថ្លែងអះអាងរួមគ្នាសាជាថ្មីអំពីការ បន្តរក្សាទំនាក់ទំនងដ៏ស្អិតល្មួតរវាងប្រទេសជាតិខាងទាំងពីរឱ្យ កាន់តែប្រសើរថែមទៀតទោះបីជាប្រទេសទាំងពីរមានរឿងក្តីក្តាំគ្នា នៅតុលាការយុតិ្តធម៌អន្តរជាតិទីក្រុងឡាអេក្នុងសំណុំរឿងប្រាសាទ ព្រះវិហារក៏ដោយ។
ក្រោយជំនួបសម្តែងការគួរសមរវាងលោកឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសកម្ពុជាលោក ហោ ណាំហុង និងឯកអគ្គរាជទូតថ្មីរបស់ថៃលោក ទូចឆៃយុទ្ធ ភក្តី (Touchayoot Pakdi) លោក កុយ គួង អ្នកនាំពាក្យក្រសួងការបរទេសកម្ពុជាបានថ្លែងប្រាប់អ្នកកាសែតថា នៅក្នុងជំនួប ភាគីទាំងពីរបានថ្លែងថា ខ្លួនបន្តជំរុញកិច្ចសហប្រតិបត្តិការល្អដែលមានស្រាប់ទាំងវិស័យ នយោបាយ និងសេដ្ឋកិច្ច។
លោកឯកអគ្គរាជទូត ទូចឆៃយុទ្ធ ភក្តី ក៏បានថ្លែងផងដែរថា លោកនឹងធ្វើយ៉ាងណាជម្រុញដល់ប្រទេសទាំងពីរឲ្យមានទំនាក់ទំនងនឹង គ្នាកាន់តែស៊ីជម្រៅបន្ថែមទៀត ដែលនេះជាអ្វីដែលលោករំពឹងថាប្រទេសទាំង ពីរធ្វើអ្វីគ្រប់យ៉ាងក៏ដើម្បីប្រជាជនផងខ្លួន៕
