ក្លិបអ្នកកាសែតកម្ពុជាប្រកាសរៀបចំការប្រកួតប្រជែងអត្ថបទសារព័ត៌មានទាក់ទងនឹង «កម្ពុជាក្នុងបរិបទកូវីដ-១៩»
សារព័ត៌មាន Cambodia News/
ភ្នំពេញ (១២ មិថុនា ២០២០) ៖ ក្លិបអ្នកកាសែតកម្ពុជាយល់ឃើញថា កម្ពុជា មិនខុសពីប្រទេសនានាលើសាកលលោកនោះទេបាន និងកំពុងទទួលរងនូវផលប៉ះពាល់យ៉ាងខ្លាំងទាំងផ្នែកសេដ្ឋកិច្ច សង្គម និងនយោបាយ ដោយសារតែការផ្ទុះការឆ្លងរាលដាលនៃជំងឺកូវីដ-១៩ ឬមេរោគកូរ៉ូណាប្រភេទថ្មីនេះ។
មិនតែប៉ុណ្ណោះ វត្តមាននៃជំងឺរាតត្បាតជាសាកលកូវីដ-១៩ ដែលបាន និងកំពុងផ្លាស់ប្តូរទម្លាប់ និង វប្បធម៌នៃការរស់នៅរបស់មនុស្សលោកផងនោះ តម្រូវឱ្យមានប្រជាជាតិនីមួយៗរួមគ្នា ដើម្បីទប់ស្កាត់ និងទប់ទល់នឹងជំងឺនេះ។ ក្នុងចំណោមតួអង្គទាំងអស់ដែលត្រូវចូលរួមប្រយុទ្ធប្រឆាំងនឹងជំងឺកូវីដ-១៩ សារព័ត៌មាន មានតួនាទីចាំបាច់មិនអាចខ្វះបានក្នុងបេសកកម្មផ្តល់ព័ត៌មានអំពីការវិវត្ត និងការអប់រំស្តីពីការបង្ការ និងការពារការឆ្លងរាលដាលជំងឺកូវីដ-១៩ និងបច្ច័យ ឬផលប៉ះពាល់នានាដែលបង្កឡើងដោយជំងឺរាតត្បាតនេះ។
ក្នុងន័យនេះក្លិបអ្នកកាសែតកម្ពុជា (Club of Cambodian Journalists) មានកិត្តិយសសូមប្រកាសរៀបចំ ការប្រកួតប្រជែងអត្ថបទសារព័ត៌មាន ទាក់ទងនឹង «កម្ពុជាក្នុងបរិបទកូវីដ-១៩» សម្រាប់អ្នកសារព័ត៌មានខ្មែរដែលកំពុងបំពេញការងារនៅតាមអង្គភាព ទូរទស្សន៍ វិទ្យុ កាសែតបោះពុម្ព សារព័ត៌មានអនឡាញ និងអ្នកកាសែតឯករាជ្យ (Freelance Journalists) នៅក្នុងព្រះរាជាណាចក្រកម្ពុជា។
I . លក្ខខណ្ឌនៃការចូលរួម
១- ការប្រកួតប្រជែងនេះត្រូវបានបើកចំហសម្រាប់អ្នកកាសែតកម្ពុជាទូទៅ ( លើកលែង សមាជិកគណៈកម្មាធិការនាយក និងបុគ្គលិករដ្ឋបាលនៃក្លិបអ្នកកាសែតកម្ពុជា ) ។ អ្នកកាសែតស្ត្រី និង អ្នកកាសែតវ័យក្មេងត្រូវបានលើកទឹកចិត្ត។
២- ការប្រកួតនេះ បើកចំហសម្រាប់បេក្ខជនជាអ្នកសារព័ត៌មាន ទូរទស្សន៍ វិទ្យុ កាសែត បោះពុម្ព ទស្សនាវដ្ដី សារព័ត៌មានអនឡាញ និងអ្នកកាសែតឯករាជ្យ (Freelance Journalists)។
៣- អត្ថបទ ដែលអាចដាក់ចូលរួមក្នុងការប្រកួតបានត្រូវតែជាប្រភេទអត្ថបទ បទយកការណ៍។ អត្ថបទព័ត៌មានប្រចាំថ្ងៃ (hard news) នឹងមិនត្រូវទទួលយកឡើយ។
៤- អត្ថបទដែលត្រូវដាក់ចូលរួមក្នុងការប្រកួត ត្រូវតែជាអត្ថបទដែលត្រូវបានចុះផ្សាយនៅតាមអង្គភាពរបស់ខ្លួន ឬអង្គភាពសារព័ត៌មានណាមួយរួចរាល់ហើយ មុនថ្ងៃទី១៣ ខែកក្កដា ឆ្នាំ ២០២០។
៥- អត្ថបទដែលត្រូវដាក់ចូលរួម ត្រូវតែជាអត្ថបទសារព័ត៌មានជាភាសាខ្មែរ។
II . ពានរង្វាន់ក្លិបអ្នកកាសែតកម្ពុជា
ក្លិបអ្នកកាសែតកម្ពុជាបានសម្រេចកំណត់ឱ្យមានជ័យលាភីចំនួន៥ ដែលនឹងទទួលរង្វាន់ដូចតទៅ៖
១. ជ័យលាភីលេខ ១ នឹងទទួលបានរង្វាន់ជាទឹកប្រាក់ចំនួន ២លាន រៀល និងពាន១
២.ជ័យលាភីលេខ ២ នឹងទទួលបានរង្វាន់ជាទឹកប្រាក់ចំនួន ១លាន២សែន រៀល និងពាន ១
៣. ជ័យលាភីលេខ ៣ នឹងទទួលបានរង្វាន់ជាទឹកប្រាក់ចំនួន ៨ សែនរៀល និងពាន ១
៤. ជ័យលាភីលេខ ៤ នឹងទទួលបានរង្វាន់លើកទឹកចិត្តជាទឹកប្រាក់ ៤សែន រៀល
៥. ជ័យលាភីលេខ ៥ នឹងទទួលបានរង្វាន់លើកទឹកចិត្តជាទឹកប្រាក់ ៤សែន រៀល
III . នីតិវិធី
– បេក្ខជនដែលចាប់អារម្មណ៍ចូលរួមប្រកួតប្រជែងស្នាដៃសារព័ត៌មាននេះ សូមផ្ញើសំណៅឯកសាររបស់ខ្លួនមកទីស្នាក់ការនៃក្លិបអ្នកកាសែតកម្ពុជាដែលមានអាសយដ្ឋាន ផ្ទះលេខ ១២ ផ្លូវលេខ ៥ (បុរី ប៉េងហួត មុខផ្សារ ប៉េសេ ផ្លូវ ៣៧១) ខណ្ឌមានជ័យ រាជធានីភ្នំពេញ យ៉ាងយូរត្រឹមថ្ងៃទី ១៣ ខែកក្កដា ឆ្នាំ ២០២០។
– ឬអាចទាក់ទងសួរព័ត៌មានបន្ថែម និងដាក់ឯកសាររបស់ខ្លួននៅក្នុងប្រព័ន្ធសង្គមតេឡេក្រាមរបស់ លោក ហេង នាង តាមរយៈលេខទូរស័ព្ទ ០១០ ៧២ ១៤ ១៦ ។
បញ្ជាក់៖ សូមបេក្ខជន និងបេក្ខនារីទាំងអស់ភ្ជាប់អត្ថបទសំណៅដើមដែលបង្ហាញថា អត្ថបទត្រូវបានចុះផ្សាយរួចហើយ ជាមួយនឹងអង្គភាពសារព័ត៌មាន៕ ដោយ ៖ ហេង នាង
