ព្រះរាជពិធីបុណ្យអុំទូកឆ្នាំនេះ នឹងមានទូកចូលរួមប្រកួតសរុបចំនួន ៣៣៨ទូកមកពីបណ្តារាជធានី-ខេត្ត
សារព័ត៌មាន Cambodia News/
ភ្នំពេញ៖ ឯកឧត្តម ឈិន កេតនា អនុប្រធានអចិន្ត្រៃយ៍ និងជាអគ្គលេខាធិការ គណៈកម្មាធិការរៀបចំបុណ្យជាតិ-អន្តរជាតិបានបញ្ជាក់ក្នុងកិច្ចប្រជុំអន្តរក្រសួង«ស្តីពីការត្រៀមរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣» ថាសម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ នេះនឹងមានទូកចូលរួមប្រណាំងប្រជែងសរុប ៣៣៨ទូកមកពីបណ្តារាជធានី-ខេត្ត។
ឯកឧត្តមក៏បានបង្ហាញពីក្តីសង្ឃឹមចំពោះគណៈកម្មការតាមផ្នែកនីមួយៗ នឹងប្រឹងប្រែងបំពេញភារកិច្ចឱ្យទទួលបានជោគជ័យ ដូចដែលនាពេលថ្មីៗនេះគឺទទួលបានជោគជ័យលើការរៀបចំទិវាបុណ្យឯករាជជាតិ០៩ វិច្ឆិកា ខួបទី៧០ ដែលទើបបញ្ចប់ទៅនេះ។
គួរបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រារព្ធធ្វើឡើងរយៈពេល៣ថ្ងៃគិតចាប់ពីថ្ងៃទី២៦ ដល់ទី២៨ ខែវិច្ឆិកា ឆ្នាំ២០២៣៕
