តួលេខចំនួនអ្នកស្លាប់ដោយសារវីរុស Covid 19 នៅទូទាំងពិភពលោក
សារព័ត៌មាន Cambodia News/
ចិន (១៣ កុម្ភៈ ២០២០) ៖ ចំនួនអ្នកបាត់បង់ជីវិត និងករណីថ្មីដោយសារការផ្ទុះជំងឺក្នុងប្រទេសចិន បានកើនឡើងយ៉ាងខ្លាំងនៅថ្ងៃព្រហស្បតិ៍នេះ ដោយមានមនុស្សបាត់បង់ជីវិតចំនួន ២៤២នាក់ថែមទៀត និងការឆ្លងថ្មីជិត ១៥,០០០ករណីនៅខេត្តហ៊ូប៉ីដែលរងគ្រោះធ្ងន់ធ្ងរ ខណៈដែលអាជ្ញាធរបានផ្លាស់ប្ដូរវិធីសាស្ត្រនៃការធ្វើរោគវិនិច្ឆ័យ។
យ៉ាងហោចណាស់មានមនុស្ស ១.៣៦១នាក់បានបាត់បង់ជីវិតនៅទូទាំងប្រទេស និងជិត ៦ម៉ឺននាក់បានឆ្លងមេរោគ បន្ទាប់ពីគណៈកម្មការសុខភាពរបស់ខេត្តហ៊ូប៉ី (Hubei) បានរាយការណ៍ពីតួលេខថ្មី។
នៅក្នុងរបាយការណ៍វិវឌ្ឍន៍ប្រចាំថ្ងៃរបស់ខ្លួន គណៈកម្មការសុខាភិបាលខេត្តហ៊ូប៉ីបានបញ្ជាក់ថា មានការឆ្លងថ្មីចំនួន ១៤.៨៤០ករណីទៀតនៅក្នុងខេត្តភាគកណ្ដាល ជាទីដែលជំងឺ Covid 19 បានផ្ទុះឡើងកាលពីខែធ្នូ។ ការកើនឡើងដ៏ច្រើននេះបានកើតឡើង ស្របពេលដែលក្រុមមន្ត្រីមូលដ្ឋានបាននិយាយថា ពួកគេកំពុងផ្លាស់ប្ដូរវិធីដែលពួកគេធ្វើរោគវិនិច្ឆ័យករណីជំងឺ COVID 19។
យោងតាមសារព័ត៌មាន South china morning post គិតត្រឹមថ្ងៃព្រហស្បតិ៍នេះ ចំនួនអ្នកបាត់បង់ជីវិតនៅចិនដីគោកកើនឡើងដល់ ១,៣៦៣នាក់ រួមទាំងម្នាក់នៅទីក្រុងហុងកុង និងម្នាក់នៅហ្វីលីពីន ចំណែកការឆ្លងឡើងដល់ ៦០,១០៧នាក់ និងជាសះស្បើយកើនដល់ ៥,៦៨០នាក់៕
