សម្តេច ហ៊ុន សែន រំលេចភាពលេចធ្លោពីព្រឹត្តិការណ៍អង្គរសង្រ្កាន្ត
សារព័ត៌មាន Cambodia News/
ដោយ ៖ ហេង នាង/
ភ្នំពេញ (១៨ មេសា ២០១៦) ៖ នៅថ្ងៃទី១៨ ខែមេសា នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបានសរសេរនៅក្នុង បណ្តាញសង្គមហ្វេសប៊ុករបស់សម្តេចថា អង្គរសង្រ្កាន្តដែលបានរៀបចំនៅក្នុងខេត្តសៀមរាប មិនត្រឹមតែបានផ្តល់នូវការកំសាន្តរីករាយដល់ប្រជាពលរដ្ឋយើងប៉ុណ្ណោះទេ ប៉ុន្តែបានធ្វើអោយភ្ញៀវទេសចរណ៍អន្តរជាតិកាន់តែស្គាល់កម្ពុជា ច្បាស់ឡើងៗ។
ទំនៀមទម្លាប់ ប្រពៃណី វប្បធម៌ និងអារ្យធម៌ដ៏ល្អឯករបស់កម្ពុជាបានបង្ហាញអោយយុវជនជំនាន់ក្រោយនិង ពិភពលោកបានដឹងនិងកោតស្ញប់ស្ញែងព្រះរាជាណាចក្រអច្ឆរិយៈរបស់យើង។
សម្តេច បានបន្តថា “អ្វីដែលជាកាតព្វកិច្ចរបស់កូនចៅជំនាន់ក្រោយ គឺយើងត្រូវរួបរួមគ្នាថែរក្សាការពារសុខសន្តិភាព ដើម្បីប្រទេសជាតិយើង កាន់តែរីកចម្រើនបានលឿនទៅមុខ និងដើម្បីប្រជាពលរដ្ឋ ជាពិសេសយុវជនយើង កាន់តែមានឱកាសច្រើនឡើង ដើម្បីកសាងអភិវឌ្ឍន៌អនាគតរបស់ខ្លួន”៕
