ប៉ូលិសសេដ្ឋកិច្ចចុះចាប់រថយន្តដឹកប្រេងច័ន្ទជាង ៥ពាន់លីត្រ
ភ្នំពេញ ៖ កាលពីវេលាម៉ោង ២១និង ៣០ នាទី យប់ថ្ងៃទី០៧ ធ្នូ ប៉ូលិសប្រឆាំងបទល្មើស សេដ្ឋកិច្ចដែលដឹកនាំដោយលោក ពិត បញ្ញា ប្រធានការិយាល័យបទល្មើសសេដ្ឋកិច្ច បាន បើកប្រតិបត្តិការណ៍ពួនស្ទាកចាប់បានរថយន្តធុនធំមួយគ្រឿងដែលដឹក ប្រេងច័ន្ទ ជាង ៥ ពាន់លីត្រ ដែលសង្ស័យដឹកគេចពន្ធ និងទឹកក្លែងបន្លំជាសារធាតុ ដែលមានទីតាំងស្ថិត នៅចំណុចផ្លូវ លេខ ១៣២ មុខផ្ទះលេខ ២១៣ ភូមិ ៦ សង្កាត់ទឹកល្អក់ទី១ ខណ្ឌទួលគោក ។
តាមប្រភពពីសមត្ថកិច្ចបានឲ្យដឹងថា ក្នុងប្រតិបត្តិការណ៍ឆែកឆេរ និង ឃាត់រថយន្តធុនធំមួយគ្រឿងខាងលើនេះសមត្ថកិច្ចបានរកឃើញធុងដាក់ប្រេង ច័ន្ទចំនួន ២៤ធុងធំ និង ៤ ធុងតូច សរុបជាង ៥ ពាន់លីត្រ។ បន្ទាប់ពីឆែកឆេរឃើញប្រេងច័ន្ទខាងលើនេះប៉ូលិសសេដ្ឋកិច្ចបានសម្រេច ឃាត់រថយន្តធុនធំមួយគ្រឿងនេះរួមជាមួយនិងប្រេងច័ន្ទទាំងអស់យកទៅ កាន់ការិយាល័យប្រឆាំងបទល្មើស សេដ្ឋកិច្ចដើម្បីត្រួតពិនិត្យ មើលឯក សារដែលនាំចូលមកក្នុងរាជធានីភ្នំពេញ បានបង់ពន្ធ ឬក៏នៅ។
ចំពោះការឆែកឆេរនិងឃាត់រថយន្តដឹកប្រេងច័ន្ទនេះសមត្ថកិច្ចនៅ មិនទាន់ហ៊ាននិយាយថា រថយន្តនេះពិតជាដឹក ប្រេងច័ន្ទខុសច្បាប់ មិនបង់ពន្ធជូនរដ្ឋ ឬក៏រថយន្តនេះដឹកមានច្បាប់និងបង់ពន្ធជូនរដ្ឋត្រឹមត្រូវនោះទេ ដោយសារតែរងចាំមើលឯកសារដែលម្ចាស់ប្រេងយកបង្ហាញនៅការិយាល័យប្រឆាំង បទល្មើសសេដ្ឋកិច្ច៕
ដោយ៖ ហេង នាង
