បារាំងចាប់ផ្ដើមទម្លាក់គ្រាប់នៅស៊ីរីសងសឹកក្រុមរដ្ឋអ៊ីស្លាម
សារព័ត៌មាន Cambodia News/
បារាំង (១៦ វិច្ចិកា ២០១៥) ៖ យន្ដហោះចម្បាំងរបស់បារាំងបានចាប់ផ្ដើមបើកយុទ្ធនាការកម្ទេចក្រុមរដ្ឋអ៊ីស្លាមវិញភ្លាមទុកជាការសងសឹក បន្ទាប់ពីមានការវាយប្រហារសម្លាប់មនុស្ស១២៩នាក់ក្នុងប្រទេសបារាំងកាលពីថ្ងៃទី១៣វិច្ឆិកា ដែលក្រុមរដ្ឋអ៊ីស្លាមបានអះអាងទទួលខុសត្រូវរួចមក ។
ការវាយប្រហារតាមជើងអាកាសរបស់បារាំងបានធ្វើឡើងកាលពីថ្ងៃទី១៥វិច្ឆិកា ហើយនេះក៏ជាលើកទីមួយដែរបន្ទាប់ពីកើតហេតុការណ៍ភេរវកម្ម។ ខណៈដែលបារាំងកំពុងប្រារព្ធពិធីបួងសួងឧទ្ទិសកុសលដល់អ្នកស្លាប់ក្នុងទីក្រុងប៉ារីស យន្ដហោះបារាំងបានទម្លាក់គ្រាប់បែក២០គ្រាប់លើទីតាំងក្រុមរដ្ឋអ៊ីស្លាមនៅក្នុងប្រទេសស៊ីរី។
តាមការបញ្ជាក់ពីក្រសួងការពារជាតិបារាំង ទីតាំងមួយចំនួនរបស់ក្រុមរដ្ឋអ៊ីស្លាមត្រូវបានបំផ្លាញ មានដូចជាទីបញ្ជាការកណ្ដាល ទីតាំងឃ្លាំងផ្ទុកសព្វាវុធ ជំរំហ្វឹកហាត់ក្រុមភេរវករជាដើម។ ការវាយប្រហារនេះ ធ្វើឡើងបន្ទាប់ពីប្រធានាធិបតីបារាំងលោក ហ្វ្រងស័រ ហូឡង់ បានចាត់ទុកអំពើភេរវកម្មកើតឡើងក្នុងក្រុងប៉ារីសជាសកម្មភាពក្នុងប្រវត្ដិសាស្ដ្រ ជាសកម្មភាពនៃសង្គ្រាម និងប្ដេជ្ញាសងសឹកដោយគ្មានក្ដីមេត្ដាឡើយ៕
