ស្រីតូច ចំណាន បន្តព្រមានប្ដឹង អ្នកបន្លំ Account ហ្វេសប៊ុក

សារព័ត៌មាន​​ Cambodia News​/

ភ្នំ​ពេញ​ (២១ មេសា ២០១៥) លោកស្រី ម៉ៅ ចំណាន ហៅស្រីតូច ចំណាន ជាភរិយារូបស្រស់ របស់មហាសេដ្ឋីស្រុកខ្មែរ អ្នកឧកញ៉ា គិត ម៉េង បានសរសេរថ្លែង ជាសាធារណៈ នៅ Account Facebook របស់ខ្លួនថា « បន្ទាប់​ពី​នាង​ខ្ញុំ​បានដាក់ពាក្យបណ្តឹង ជូនអគ្គស្នងការនគរបាលជាតិ ដើម្បីមាន វិធានការ ចាប់ជនខិលខូចដែលក្លែងបន្លំប្រើប្រាស់ឈ្មោះ និង​រូប​ថត​នាង​ខ្ញុំ​នៅ​លើ​បណ្តាញ​សង្គមហ្វ៊េសប៊ុករួចមក បច្ចុប្បន្ននេះ គណនីហ្វេសប៊ុកទាំងពីរ ត្រូវបានជនល្មើសបិទ ដើម្បីរត់គេចចេញ ពីសំណាញ់ច្បាប់ហើយ ។ [ អានបន្ត​ ]

ចំណែក គណនីហ្វេស ប៊ុកមួយចំនួនទៀត ដែលក្លែងបន្លំ ប្រើប្រាស់ឈ្មោះ និងរូបថតនាងខ្ញុំ ខ្លះក៏បានបិទគណនី ចោលហើយ និងខ្លះទៀត មិន​ទាន់​បានបិទគណនីចោល នៅឡើយទេ បន្ទាប់ពីនាងខ្ញុំ បាន​ធ្វើ​ការ​ជូន​ដំណឹង​ទៅ ដល់ម្ចាស់គណនី ទាំងអស់នោះរួចមក» ។

លោកស្រី ស្រីតូច ចំណាន បានសរសេរបន្តថា «ដូច្នេះនាងខ្ញុំសូមធ្វើការរំឭកជាលើកចុងក្រោយ ទៅដល់ម្ចាស់គណនី ហ្វេសប៊ុក ដែលក្លែងបន្លំប្រើប្រាស់ឈ្មោះនិងរូបថតនាងខ្ញុំ ដែលមិនទាន់បានបិទគណនីចោលនោះ (ដូចមានឈ្មោះ និងអាស័យដ្ឋានដាក់បង្ហាញ នៅខាងក្រោមនេះ) មេត្តាប្រញាប់បិទគណនីទាំងអស់នោះ ចោលជាបន្ទាន់ មុនពេល នាងខ្ញុំ មិនទាន់បន្តដាក់ពាក្យបណ្តឹង ជូនអគ្គស្នងការនគរបាលជាតិ ដើម្បីធ្វើការស្រាវជ្រាវ នឹងចុះចាប់ទៀតនោះ» ៕