សុគន្ធ និសា លេចឭថៅកែហាងនៅអាមេរិកសុំស្នេហ៏
សារព័ត៌មាន Cambodia News/
ភ្នំពេញ (២៦ កញ្ញា ២០១៤) ៖ បន្ទាប់ពីបានផ្ដាច់នូវចំណងស្នេហ៍ជាមួយលោក សុខ ជំនោរ អ្នកនិពន្ធទំនុកច្រៀងដ៏ល្បីម្នាក់កាលពីប៉ុន្មានឆ្នាំមុននេះរួចមក នោះ តារាចម្រៀង សុគន្ធ និសា បានរងនូវព្យុះព័ត៌មានជាច្រើនដែលបោកបក់លើនាងក្នុងនេះក៏មាន ព័ត៌មាននៃការចោមរោមសុំស្នេហ៍ពីបុរសទាំងឡាយទាំងនៅក្នុងស្រុក និងនៅឯបរទេសផងដែរ។
កាលពីពេលថ្មីៗកន្លងមកនេះ បើតាមប្រភពពីអ្នកសិល្បៈខ្លះបានទម្លាយឲ្យដឹងថា នៅក្នុងចំណោមបុរសទាំងអស់ដែលបានព្យាយាមតាមសុំស្នេហ៍ពីតារាចម្រៀង ល្បី សុគន្ធ និសា នោះ បច្ចុប្បន្ននេះជ័យជំនះបានធ្លាក់ទៅលើបុរសវ័យជាង៣០ឆ្នាំម្នាក់ ដែលជាអ្នកជំនួញមានជីវភាពធូរធាម្នាក់ជាអាណិកជនខ្មែររស់នៅក្នុង ទីក្រុងឡុងប៊ិចសហរដ្ឋអាមេរិក។
តាមប្រភពដដែលបានបញ្ជាក់ថា តារាចម្រៀង សុគន្ធ និសា បានសម្រេចចិត្តទទួលសេចក្ដី ស្រលាញ់ពីបុរសដែលជាអាណិកជនខ្មែររស់នៅឯ សហរដ្ឋអាមេរិករូបនោះហើយ បន្ទាប់ពីបុរសដែលជាថៅកែភោជនីយដ្ឋាន និងមានភាគហ៊ុននៅក្នុងហាងលក់ទំនិញផ្សេងទៀតនៅសហរដ្ឋអាមេរិករូបនោះ បានព្យាយាមតាមសុំស្នេហ៍ពីនាងចាប់តាំងពីពេលដែលតារាចម្រៀងរូបនេះ បានចេញទៅច្រៀងនៅសហរដ្ឋអាមេរិកកាលពីប្រមាណរយៈពេលជាងមួយឆ្នាំមុន កន្លងមកនោះ។
ផ្អែកតាមប្រភពពីអ្នកស្និទ្ធជាមួយតារាចម្រៀល្បីដែលបានចាក ចេញពីផលិតកម្ម ហង្សមាស និងរស្មីហង្សមាសទៅជ្រកក្រោមដំបូលផលិតកម្ម ថោន ដោយសារបញ្ហាប្រេះឆាទំនាក់ទំនងស្នេហ៍ជាមួយអ្នកនិពន្ធទំនុកច្រៀងលោក សុខ ជំនោរ រូបនេះក៍បានឲ្យដឹងដែរថា តារាចម្រៀង សុគន្ធ និសាបានសម្រេចចិត្តទទួលយកសេចក្ដីស្រលាញ់ពីបុរសអាណិកជនខ្មែររស់នៅ សហរដ្ឋអាមេរិករូបនោះគឺដោយសារនាងបានមើលឃើញនូវលក្ខណៈសម្បត្តិដ៍ល្អ របស់បុរសរូបនោះមានច្រើន ពិសេសក្រៅពីពូកែខាងរកស៊ី និងមានរូបសម្បត្តិសមរម្យនោះបុរសរូបនេះគឺជាមនុស្សស្លូតបូត សុភាពរាបសា និងមានលទ្ធភាពគ្រប់គ្រាន់ក្នុងការបង្កើតក្រុមគ្រួសារមួយដ៏មាន សុភមង្គលសម្រាប់នាងផងដែរ។
តារាចម្រៀងរូបនេះខណៈជួបសម្ភាសន៍ជា មួយអ្នកសារព័ត៌មាននៅក្នុងពេលកន្លងមកនោះនាងបានបដិសេធចំពោះព័ត៌មាន ដែលលេចឮស្ដីពីទំនាក់ទំនងស្នេហារបស់ខ្លួនជាមួយនឹងបុរសទាំងឡាយដោយ នាងបានបញ្ជាក់ ថាបេះដូងនាងពិតជានៅទំនេរ និងនៅមិនទាន់គិតដល់រឿងថ្មីស្នេហានោះនៅឡើយទេ៕
