ពៅ បញ្ញាពេជ្រ មានបំណងឡើងច្រៀងជាថ្មី
បើទោះបីជាពេលនេះតារាចម្រៀងតូចច្រឡឹង សំនៀងរ៉ៃកន្តឹង ពៅ បញ្ញាពេជ្រ កុំពុងស្ថិតនៅក្នុងសភាពពិកាអង្គុយតែលើរទេះរុញក៍ដោយ ប៉ុន្តែនាងនៅតែមានបំណងឡើងច្រៀងជាថ្មីនៅតាមឆាកប្រគុំតន្ត្រីរបស់ស្ថានិយទូរទស្សន៍នានា ខណះពេលដែលអាការះជំងឺរបស់នាងហាក់ធូរស្បើយបន្តិចនោះ។
ស្ថិតនៅក្នុងភាពពិការដោយសារជំងឺផ្នែកឆ្អឹងខ្នងដោយសារការបាញ់ប្រហារពីឃាតករដ៏សាហាវយ៉ង់ឃ្នងគ្មានត្រាប្រណីនោះ អតីតតារាចម្រៀងប្រចាំផលិតកម្មរស្មីហង្សមាសរូបនេះគឺនៅថែរក្សាសម្លេងដ៏ក្រលួចរបស់នាងដដែល បើទោះបីជាពេលនេះនាងហាក់មានការហត់នៅពេលស្រែកច្រៀងមួយបទៗក៍ដោយ។
ចាប់តាំងពីការវិលត្រឡប់មកព្យាបាលជំងឺនៅក្នុងប្រទេសកម្ពុជាវិញ ពៅ បញ្ញាពេជ្រ នៅមិនទាន់មានឱកាសបង្ហាញមុខជាសាធារណះនៅឡើយទេ ដោយហេតុផលការបារម្ភលើសុវត្ថិភាពរបស់នាង។ នាងបានត្រឹម បង្ហាញមុខតាមបណ្តាញសង្គមហ្វេសប៊ុកប៉ុណ្ណោះ ប៉ុន្តែឱកាសក្នុងការបង្ហាញខ្លួនតាមកញ្ចក់ទូរទស្សន៍ជាថ្មីគឺនៅទ្រឹង បើទោះបីជាពេលនេះនាងហាក់មិនសូវមានការព្រួយបារម្ភពីសុវត្ថិភាពរបស់នាងក៍ដោយ ។ គេនៅចាំបានថា កន្លងមកអតីតតារាចម្រៀងរូបនេះធ្លាប់បានអះអាងនៅក្នុងពេលដែលនាងហ៊ានមកជាន់ដីស្រុកខ្មែរជាលើកទី២នេះថា នាងមិនមានការព្រួយបារម្ភពីសុវត្ថិភាពរបស់នាងខ្លាំងឡើយ ដោយសារថា ការវិលត្រឡប់មកជាន់ទឹកដីកំណើតជាថ្មីនាពេលនេះគឺមិនមែននាងជាមនុស្សធម្មតាដូចមុនឡើយ ពោលគឺនាងបានក្លាយជាជនពិការទៅហើយ។អ្វីដែលនាងមកនាពេលនេះគឺសុំត្រឹមតែបន្តការព្យាបាលជំងឺនៅក្នុងទឹកដីកំណើត ក្នុងក្តីសង្ឃឹមថា អាចបានជាសេះស្បើយ និងអាចមានឱកាសប្រឡូកក្នុងសិល្បះបន្តទៀត។
ស្ថិតនៅក្នុងការស្រឡាញ់វិស័យសិល្បះចម្រៀងនេះ ពៅ បញ្ញាពេជ្រ បានត្រឹមតែបង្ហើរសំនៀងរបស់នាងនៅក្នុងបន្ទប់គេងតែម្នាក់ឯង ដោយក្តីរំពឹងថា ថ្ងៃណាមួយនាងនឹងមានឱកាសចេញមុខតាមកញ្ចក់ទូរទស្សន៍ជាថ្មី។
តារាចម្រៀងសំនៀងរៃកន្តឹងរូបនេះបានអះអាងថា នាងនឹងរីករាយស្វាគមន៍ចំពោះបណ្តាលស្ថានីយទូរទស្សន៍នានាដែលផ្តល់ឱកាសឲ្យនាងឡើងឆាកជាថ្មី។នាងបន្តថា បើទោះបីជាពេលនេះនាងនៅមិនទាន់អាចដើរបានក៍ដោយ តែនាងនៅតែមានបំណងឡើងឆាកតន្ត្រីច្រៀងដដែល ដោយមិនមានការស្ទាក់ស្ទើរឡើយ។នាងពិតជាចង់បង្ហើរសំនៀងឲ្យអ្នកដែលធ្លាប់គាំទ្រទឹកដមសំនៀងរបស់នាងបានស្តាប់សារជាថ្មី បើទោះជាពេលនេះនាងយល់យ៉ាងច្បាស់ថា មានមនុស្សមួយចំនួនបានស្អប់ខ្ពើមនាងក៍ដោយ តែក៍នៅមានមួយចំនួនទៀតនៅតែអាណិតស្រលាញ់នាងដដែល ព្រោះអ្វីៗនាងមិនបានធ្វើខុសឡើយ។ទោះជាយ៉ាងណា ពៅ បញ្ញាពេជ្រ នៅតែមិនមានការរំពឹងទុកថា នាងនឹងមានឱកាសឡើងច្រៀងជាថ្មីឡើយ ដោយសារតែនាងយល់ថា ប្រហែលមកពីម្ចាស់ស្ថានីយទូរទស្សន៍ទាំងអស់នៅតែមានការព្រួយបារម្ភពីសុវត្ថិភាពរបស់នាងដដែល។
ពៅ បញ្ញា ពេជ្រ បញ្ជាក់ថា ឱកាសបានច្រៀងឡើងវិញនេះក៍ជាការជួយដល់រូបនាងក្នុងការរកប្រាក់មកបន្តការព្យាបាលជំងឺរបស់នាងផងដែរ ហេតុនេះនាងនឹងរីករាយទទួលយកការស្នើសុំពីម្ចាស់ស្ថានីយទូរទស្សន៍នានាដោយឥតរុញរាឡើយ។
ងាកមកអាការះជំងឺវិញ ពៅ បញ្ញាពេជ្រ បានអះអាងថា ជំងឺរបស់នាងហាក់មានសភាពគ្រាន់បើជាងមុនបន្តិច ដោយសារតែនាងតែងតែធ្វើលំហាត់ប្រាណតាមការណែនាំរបស់ក្រុមវេជ្ជបណ្ឌិត។ នាងបញ្ជាក់ថា នាពេលថ្មីៗនេះនាងបានរកឃើញថ្នាំម្យ៉ាងដែលអាចព្យាបាលជំងឺប្រភេទនាង តែថ្នាំនោះនៅមិនទាន់មានលក់នៅក្នុងស្រុកខ្មែរនៅឡើយទេ ហេតុនេះនាងត្រូវបន្តតាមដានបន្ថែមទៀត ម្យ៉ាងនាងក៍តាមដានទៅលើប្រសិទ្ធភាពថ្នាំនោះផងដែរ ព្រោះវានៅមិនទាន់ថាពូកែមួយរយភាគរយនោះទេ។ទោះជាយ៉ាងណាប្រសិនបើថ្នាំនោះពិតជាពូកែមែននោះនាងក៍មិនទាន់សង្ឃឹមថាអាចមានលទ្ធិភាពទិញយកមកប្រើដែរ ព្រោះវាមានតម្លៃថ្លៃ។ ពៅ បញ្ញាពេជ្រ នៅតែធ្វើការអំពាវនាវដល់សប្បុរសជននានាមេត្តាជួយឧបត្ថម្ភដល់រូបនាងដើម្បីបានបន្តការព្យាបាលជំងឺដ៍រាំរ៉ៃមួយនេះផង៕
ដោយ៖ ស.រ