ថៃនឹងធ្វើការបោះឆ្នោតជាថ្មីនៅខែកក្កដាខាងមុខ
សារព័ត៌មាន Cambodia News/
ថៃ (២១ មេសា ២០១៤) ៖ កាលពីថ្ងៃទី២០ ខែមេសា មន្ដ្រីគណៈកម្មាធិការរៀបចំការបោះឆ្នោតថៃ បាននិយាយថា បេក្ខជនតំណាងរាស្ដ្រទាំងអស់ អាចទៅចុះឈ្មោះក្នុងបញ្ជីបោះឆ្នោតបានគ្រប់ទីកន្លែង ដើម្បីត្រៀមសម្រាប់ការបោះឆ្នោតជាថ្មី ដែលនឹងប្រព្រឹត្ដិទៅនៅក្នុងខែកក្កដាខាងមុខ។
ការលើក ឡើងបែបនេះ ត្រូវបានគណៈកម្មាធិការរៀបចំការបោះឆ្នោតថៃបញ្ជាក់ថា ការចុះឈ្មោះរបស់បេក្ខជនតំណាងរាស្ដ្រលើកនេះ ពិតជាមិនមានការរំខានដូចកាលពីមុនឡើយ ហើយគណៈកម្មាធិការរៀបចំការបោះឆ្នោតក៏បានត្រៀមនូវវិធីសាស្ដ្រ ស្របច្បាប់រួចរាល់ហើយដែរ ដើម្បីទប់ស្កាត់បញ្ហាដែលកើតឡើងជាយថាហេតុ។ 
ទោះបីជាយ៉ាងណាក៏ដោយ ស្ថាប័នមួយនេះបានទទូចម្ដងហើយម្ដងទៀត ឱ្យរដ្ឋាភិបាលនិងក្រុមប្រឆាំង បើកកិច្ចពិភាក្សាមួយដើម្បីដោះស្រាយបញ្ហា ដែលភាគីទាំងពីរមិនយល់ស្របសម្រាប់ការបោះឆ្នោតជាថ្មី ជៀសវាងការប្រឈមមុខដាក់គ្នា ក៏ដូចជាមានការរំខានដូចដែលធ្លាប់កើតមានកន្លងមក។
សូមបញ្ជាក់ ថា ជាមួយនឹងការប្រកាសរបស់គណៈកម្មាធិការ រៀបចំការបោះឆ្នោត ថានឹងរៀបចំការបោះឆ្នោតជាថ្មី គណបក្សភឿថៃ ដែលជាគណបក្សគាំទ្ររដ្ឋាភិបាលបានស្នើឱ្យធ្វើឡើងនៅថ្ងៃទី ១៥ខែមិថុនា ប៉ុន្ដែក្រុមប្រឆាំងវិញបានទាមទារ ធ្វើកំណែទម្រង់ជាតិមុនពេលរៀបចំការបោះឆ្នោត៕
