អេហ្សីប ប្រកាសផ្តាច់ទំនាក់ទំនងការទូតជាមួយរដ្ឋាភិបាលស៊ីរី
លោក ប្រធានាធិបតី អេហ្សីប Mohamed Morsi បានប្រកាសពីសៅរ៍ទី១៥ មិថុនា ផ្តាច់ទំនាក់ទំនងការទូតរវាងរដ្ឋាភិបាលស៊ីរីបច្ចុប្បន្នដែល ដឹកនាំដោយលោក Bachar el Assad។ រដ្ឋាភិបាលអេហ្ស៊ីប បានអះអាងមិនពេញចិត្តចំពោះស៊ីរី ដែលមានការគាំទ្រ ពី ចលនាហេបូឡា ដែលកាន់នីកាយ Chiit។
លោក Mohamed Morsi ប្រធានាធិបតីអេហ្ស៊ីប បានសម្រេចចិត្ត ផ្តាច់ទំនាក់ទំនង ការទូតជាមួយ រដ្ឋាភិបាលស៊ីរី កាលពីថ្ងៃសៅរ៍ទី១៥ មិថុនា។ ស្ថានទូតរបស់ស៊ីរី នៅទីក្រុង Caire ត្រូវបាន គេបិទ ហើយមន្ត្រីការទូតទាំងអស់តម្រូវឱ្យទ្រឡប់ទៅប្រទេសវិញ។ ចំណែកមន្ត្រីការទូត របស់អេហ្ស៊ីប ក៏រដ្ឋាភិបាលប្រកាសឱ្យត្រឡប់ ចូលស្រុកវិញដែរ។
ការសម្រេចចិត្តនេះ បានធ្វើឱ្យសហគមន៍អន្តរជាតិ និងប្រទេសមួយចំនួន នៅក្នុងសម្ព័ន្ធអារ៉ាប់មានការពេញចិត្តយ៉ាងខ្លាំង។ លើចំណុចនេះ អេហ្ស៊ីប ក៏ចង់បង្ហាញពីការសាមគ្គីភាពរបស់ខ្លូនផងដែរ ជាមួយសម្ព័ន្ធអារ៉ាប់ ដែលប្រឆាំង នឹងរដ្ឋាភិបាលរបស់ លោក អាសាដ។
អ្នកវិភាគលើ នយោបាយ របស់វិទ្យាស្ថានសិក្សា និងស្រាវជ្រាវ នយោបាយ មួយនៅអេហ្ស៊ីប បានយល់ថា របត់នេះ គឺ ជាលេសមួយ របស់ លោក Morsi ក្នុងគោលបំណងបង្វែរការចាប់អារម្មណ៍ អំពីវិបត្តិសេដ្ឋកិច្ច នៅក្នុងប្រទេស និងការផ្លាស់ប្តូរគំនិត ប្រជាជន ដែលមិនពេញចិត្តពីការដឹកនាំរបស់លោក។
គឺនៅថ្ងៃទី៣០ មិថុនាខាងមុខ ជាថ្ងៃគម្រប់មួយឆ្នាំ ក្នុងការឡើងកាន់អំណាចរបស់លោក Mohamed Morsi ហើយក៏ជាថ្ងៃ ដែលក្រុមប្រឆាំងក្នុងប្រទេសអេហ្ស៊ីបជាច្រើន គ្រោងនឹងធ្វើបាតុកម្មដើម្បីសុំឱ្យលោកចុះចេញពីតំណែងផង ដែរ។
ចំពោះខាងគណបក្សប្រឆាំង នៅអេហ្ស៊ីបវិញ បានបង្ហាញពីកង្វល់របស់ខ្លួនថា ការប្រកាសនេះ នឹងធ្វើឱ្យមានស្ថានភាពតឹងតែង រវាងស៊ីរី និងអេហ្សីប។ ជាពិសេស ដល់ក្រុមភៀសខ្លួនស៊ីរី ដែលបានមកលើទឹកអេហ្ស៊ីប ប្រមាណ ៣០ម៉ឺននាក់។ ហើយសម្រាប់ជនជាតិអេហ្ស៊ីប ជាង១០ម៉ឺននាក់ ដែលធ្វើការ និងរស់នៅស៊ីរី វិញក៏នឹងត្រូវប្រឈមមុខនឹងការលំបាកដែរ។
នៅក្នុងសេចក្តីប្រកាសនោះដែរ លោក Mohamed Morsi ក៏មិនបានភ្លេច ព្រមានដល់ក្រុមអ្នកប្រឆាំងថា កុំឱ្យចេះតែបង្ករភាពវឹកវរក្នុងប្រទេស ដែលនឹងធ្វើឱ្យប្រទេសធ្លាក់ក្នុងភាពមហន្ត រាយ តាមរយៈ ការបំផុសឱ្យមានបាតុកម្ម ប្រឆាំងរូបលោកជាដើម។
ប្រតិកម្មតបវិញនឹងការ ផ្តាច់ទំនាក់ទំនងការទូតនេះ កាលពីថ្ងៃអាទិត្យទី១៦ មិថុនា រដ្ឋាភិបាលទីក្រុងដាម៉ាស់ បានប្រកាសថ្កោសទោស រដ្ឋាភិបាលទីក្រុង Caire ថាជាទង្វើដែលគ្មានទំនួលខុសត្រូវ។ ហើយទីក្រុងដាម៉ាស់បញ្ជាក់ថា ទាំងនេះមិនមែន កើតចេញអំពីឆន្ទៈ របស់ប្រជាជនអេហ្ស៊ីបទេ។តែផ្ទុយទៅវិញ លោក Mohamed Morsi ផ្ទាល់ កំពុងតែស្ថិតក្រោមខ្សែរញ៉ាក់ របស់ សហរដ្ឋអាមេរិក និងអ៊ីស្រាអែល៕ដោយ ជា ប៊ុនធឿន (RFI)