រុស្ស៊ីដោះលែងស្ត្រីអ្នកទោស Maria Aliokhina សមាជិកក្រុមចម្រៀង Pussy Riot
នៅថ្ងៃ ចន្ទនេះ នៅប្រទេសរុស្ស៊ី ស្ត្រីអ្នកទោស Maria Aliokhina ជាសមាជិកនៃក្រុមចម្រៀង Pussy Riot បានចាកចេញពីពន្ធនាគារមុនពេលកំណត់ ស្របតាមក្របខណ្ឌនៃច្បាប់លើកលែងទោស ដែលសភារុស្ស៊ីទើបបោះឆ្នោត នាពេលថ្មីៗនេះ។ Maria Aliokhina ត្រូវតុលាការកាត់ទោសអោយជាប់ពន្ធនាគារ២ឆ្នាំ ពីបទបានធ្វើការបែរបន់នៅវិហារមួយកន្លែងនៅក្រុងម៉ូស្គូ កាលពីខែកុម្ភៈ ឆ្នាំ២០១២ ទាមទារអោយប្រមុខគ្រិស្តសាសនាអ័រថូដុក្សរុស្ស៊ី សម្តេចសង្ឃ Kirill ជួយបណ្តេញប្រធានាធិបតីពូទីនចេញពីអំណាច។
នៅប្រទេស រុស្ស៊ី ថ្ងៃចន្ទនេះ ស្ត្រីអ្នកទោស Maria Aliokhina ជាសមាជិកនៃក្រុមចម្រៀងរុស្ស៊ី Pussy Riot ភូស៊ី រ៉ាយយ៉ូត បានចាកចេញពីពន្ធនាគារ ស្របតាមក្របខណ្ឌនៃច្បាប់លើកលែងទោស ដែលសភារុស្ស៊ីបានបោះឆ្នោត នាពេលថ្មីៗនេះ។
គួររំលឹកថា Maria Aliokhina អាយុ២៥ឆ្នាំ និងសមាជិកក្រុមចម្រៀង ភូស៊ី រ៉ាយយ៉ូត មួយរូបទៀត គឺ Nadejda Tolokonnikova អាយុ២៤ឆ្នាំ ត្រូវបានតុលាការកាត់ទោសអោយជាប់ពន្ធនាគារ២ឆ្នាំ ពីបទបានធ្វើការបែរបន់នៅវិហារមួយកន្លែងនៅក្រុងម៉ូស្គូ កាលពីខែកុម្ភៈ ឆ្នាំ២០១២។ កាលណោះ ស្ត្រីទាំងពីរបានទាមទារ ប្រមុខគ្រិស្តសាសនាអ័រថូដុក្សរុស្ស៊ី សម្តេចសង្ឃ Kirill អោយជួយបណ្តេញប្រធានាធិបតីពូទីនចេញពីអំណាច។ តាមធម្មតា ស្ត្រីទាំងពីររូបនេះ នឹងត្រូវដោះលែងនៅខែមិនា ឆ្នាំ២០១៤ខាងមុខ។ ប៉ុន្តែ ច្បាប់លើកលែងទោសដែលសភាទើបបានបោះឆ្នោត អាចជួយអោយពួកគេបានចេញពីពន្ធនាគារមុនពេលកំណត់។ ម្យ៉ាងទៀត នេះក៏ដោយសារតែស្ត្រីអ្នកចំរៀងទាំង២ មានកូនៗនៅទន្ទឹងចាំផ្លូវនៅផ្ទះផងដែរ។
ទោះជាបានចាកចេញពី ពន្ធនាគារមុនពេលកំណត់ក្តី Maria Aliokhina បានប្រាប់ថា ការលើកលែងទោសនេះ មិនមែនជាទង្វើមនុស្សធម៌នោះទេ។ គឺជាប្រតិបត្តិការផ្នែកទំនាក់ទំនងសាធារណៈរបស់រដ្ឋាភិបាលរុស្ស៊ី ពោលគឺជាយុទ្ធសាស្ត្ររុស្ស៊ីនៅមុនពិធីប្រកួតកីឡាអូឡាំពិករដូវរងារ នៅខែកុម្ភៈ ខាងមុខនេះ។ អ្នកចំរៀងរុស្ស៊ី Maria បន្ថែមថា ប្រសិនបើគាត់មានជម្រើស នោះគាត់ប្រហែលជាមិនព្រមចាកចេញពីពន្ធនាគារនោះទេ។
កាលពី សប្តាហ៍មុន ប្រធានាធិបតីរុស្ស៊ី បានប្រកាសថាស្ត្រីអ្នកចំរៀងក្រុមភូស៊ី រីយ៉ូ ទាំងពីររូប គឺ Maria និង Nadejda នឹងបានទទួលការលើកលែងទោសតាមច្បាប់ ដូចជាមហាសេដ្ឋីប្រេង រ៉ូដូខូវស្គី ដែលទើបបានចាកចេញពីពន្ធនាគារ កាលពីចុងសប្តាហ៍កន្លងទៅដែរ។
ច្បាប់លើកលែងទោសរុស្ស៊ីក៏បានជួយ សមាជិកនាវាអង្គការបរិដ្ឋាន Greenpeace ៣០រូប ដែលរុស្ស៊ីបានឃាត់ខ្លួន កាលពីខែកញ្ញាកន្លងទៅ អោយរួចផុតពីសវនាការកាត់ទោសនៅរុស្ស៊ីផងដែរ។ សមាជិកនាវា Greenpeace ៣០រូប នេះបានឡើងទៅស្ថានីយបូមប្រេងរុស្ស៊ីមួយកន្លែង នៅតំបន់អាក់ទិច បរិហារពីការបំពុលបរិដ្ឋាននៅទីនោះ។
យោងតាមអង្គការសិទ្ធិមនុស្ស នានា ច្បាប់លើកលែងទោសរុស្ស៊ីអាចជួយដោះលែងអ្នកទោសប្រមាណតែ ១៥០០នាក់ប៉ុណ្ណោះ គឺបានតិចតួច បើគិតក្នុងចំណោមអ្នកទោសសរុប ៧សែននាក់នៅរុស្ស៊ី៕ដោយ ព្រំ សឿន សូលីណា (RFI)
