ពួកឧទ្ទាមហ្វីលីពីនចាប់មនុស្សជាច្រើននាក់ធ្វើជាចំណាប់ខ្មាំង
ក្រុម ឧទ្ទាមនៃចលនាឥស្លាមដែលជា ក្រុមប្រឆាំងទៅនឹងកិច្ចចរចារសន្តិភាពជាមួយរដ្ឋាភិបាលក្រុងម៉ានីល បានចាប់មនុស្សប្រមាណជា ២០ នាក់ធ្វើជាចំណាប់ខ្មាំងនៅព្រឹកព្រលឹមថ្ងៃអង្គារនេះ។ ការប្រយុទ្ធគ្នាក៏បានកើតឡើងផងដែរនៅឯ កោះមីនដាណាវ រវាងក្រុម ឧទ្ទាមជាមួយកងទ័ពហ្វីលីពីន។
សូរកាំភ្លើង បានលាន់លឺឡើងម្តងទៀតទាំងព្រឹកព្រលឹមថ្ងៃអង្គារនេះ នៅ ជិតទីក្រុងកំពង់ផែឈ្មោះ Zamboanga ស្ថិតនៅលើកោះមីនដាណាវ ដែលមានប្រជាជនរស់នៅ ៨០ ម៉ឺននាក់។ ពួកឧទ្ទាមបានចាប់មនុស្សប្រមាណជា ២០ នាក់ទៀត ធ្វើជាចំណាប់ខ្មាំង។ កាលពីថ្ងៃចន្ទ ពួកឧទ្ទាមប្រដាប់អាវុធពី ២០០ ទៅ ៣០០ នាក់ដែលជាសមាជិកក្រុមរណសិរ្ស ម៉ូរ៉ូរំដោះជាតិក៏បានចូលទៅកោះមីន ដាណាវនេះដែរដោយចាប់មនុស្សជាច្រើននាក់ធ្វើជាចំណាប់ខ្មាំង។ ការប្រយុទ្ធគ្នាក៏បានសម្លាប់មនុស្ស២៤នាក់ផងដែរ។
នៅព្រឹកថ្ងៃអង្គារនេះ ពួកឧទ្ទាមបានបើកការវាយប្រហារជាថ្មីចាប់មនុស្សជាច្រើនធ្វើជាចំណាប់ ខ្មាំងបន្ថែមទៀត។ ប្រភពពីអាជ្ញាធរបានឲ្យដឹងថា មានមនុស្សរហូតដល់ជាង ១៧០ នាក់ឯណោះដែលត្រូវបានចាប់ខ្លួនដោយក្រុមឧទ្ទាម។ ប្រជាពលរដ្ឋទាំងនោះត្រូវបានប្រើប្រាស់ជារបាំងដើម្បីការពារការ វាយបកពីសំណាក់កងកម្លាំងអាជ្ញាធរ។ អ្នកភូមិជាង ១៥០០ នាក់ផ្សេងទៀតបានភៀសខ្លួនចេញពីផ្ទះសម្បែង។
ស្ថាបនិកនៃចលនារណសិរ្សម៉ូរ៉ូរំដោះជាតិបាន លោក Nur Misuari បានប្រកាស«ឯករាជ្យ»នៃតំបន់ដែលមានពលរដ្ឋឥស្លាមយ៉ាងច្រើនរស់នៅ និងបានអំពាវនាវឲ្យក្រុមប្រដាប់អាវុធរបស់ខ្លួនចូលកាន់កាប់អាគារ រដ្ឋាភិបាលទាំងឡាយនៅទីនោះទៀតផង។ ប្រធានាធិបតី ហ្វីលីពីន លោក ប៊ីនីណូ អាគូណូ បានបញ្ជូនទីប្រឹក្សាផ្នែកសន្តិសុខម្នាក់ទៅកាន់តំបន់នោះហើយដើម្បី ចរចាជាមួយក្រុមឧទ្ទាម។
គួររម្លឹកថា ក្រុមរណសិរ្សម៉ូរ៉ូរំដោះជាតិហ្វីលីពីនបានចុះហត្ថលេខាលើ កិច្ចព្រមព្រៀងសន្តិភាពមួយកាលពីឆ្នាំ ១៩៩៦ ជាមួយរដ្ឋាភិបាលទីក្រុងម៉ានីល ហើយចាប់ពីពេលនោះមក ពួកគេបានបោះបង់ចោលការទាមទារឯករាជ្យទៀតហើយ ដោយគ្រាន់តែចង់បាន ស្វ័យភាពនៃតំបន់នោះតែប៉ុណ្ណោះ។
ប៉ុន្តែ រដ្ឋាភិបាលទីក្រុងម៉ានីលបានបែរទៅចរចាជាមួយក្រុមទាមទារឯករាជ្យ មួយទៀតដែលមានឈ្មោះថា រណស្សិម៉ូរ៉ូរំដោះឥស្លាម។ ក្រុមនេះមានបំណងដាក់តំបន់ឥស្លាមនេះឲ្យទៅជាស្វ័យភាពនៅឆ្នាំ ២០១។ កិច្ចរចាជាមួយក្រុមថ្មីនេះបានធ្វើឲ្យក្រុមរណសិរ្សម៉ូរ៉ូ រំដោះជាតិមិនសប្បាយចិត្ត ពីព្រោះពួកគេបានហៅការចរចានេះថាបានធ្វើ ឲ្យក្រុមរបស់ខ្លួននិងកិច្ចព្រមព្រៀងគ្នាកាលពីឆ្នាំ ១៩៩៦ អស់តម្លៃ។ ហេតុដូច្នេះហើយបានជាពួកគេសម្រេចចិត្តបើកការវាយប្រហារបែបនេះ៕ដោយ ប៉ែន បូណា (RFI)
