ព្រះមហាក្សត្រជាតួអង្គដ៏សំខាន់ក្នុងការសម្របសម្រួលនយោបាយ
ភ្នំពេញ ៖ នៅថ្ងៃទី២១ ខែសីហា នេះ លោក សុខ ទូច អ្នកវិភាគស្ថានការណ៍នយោបាយឯករាជ្យ មានប្រសាសន៍ថា ព្រះមហាក្សត្រជាតួអង្គដ៏សំខាន់ក្នុងការសម្របសម្រួលនយោបាយ ប្រកបដោយប្រសិទ្ធិភាពនៅក្រោយការបោះឆ្នោតសភានីតិកាលទី៥នៅ កម្ពុជា។
លោក សុខ ទូច បង្ហាញការមិនមានជំនឿថាជំនួបនានា ដែលផ្តើមដោយមន្ត្រីថ្នាក់ក្រោមរបស់គណបក្សធំទាំងពីរ អាចដោះស្រាយភាពមិនប្រក្រតីនៃការបោះឆ្នោតបាន។
ដោយ ឡែក លោក កែម ឡី អ្នកស្រាវជ្រាវការអភិវឌ្ឍន៍សង្គម និងជាអ្នកវិភាគឯករាជ្យ ក៏គ្មានទំនុកចិត្តទៅលើកិច្ចពិភាក្សាគ្នារបស់មន្ត្រីថ្នាក់ក្រោម គណបក្សប្រជាជនកម្ពុជា និងគណបក្សសង្គ្រោះជាតិដែរ។ ប៉ុន្តែលោកមានប្រសាសន៍ថា បើសិនជាជំនួបផ្តើមដោយថ្នាក់ដឹកនាំកំពូល របស់គណបក្សធំៗទាំងពីរជួបពិភាក្សាគ្នាវិញ ទើបអាចទម្លាយភាពទាល់ច្រកនៅក្រោយការបោះឆ្នោតនេះបាន។
កាល ពីថ្ងៃទី២០ ខែសីហា ក្រុមការងាររបស់គណបក្សប្រជាជនកម្ពុជា ដឹកនាំដោយលោក ព្រុំ សុខា និងក្រុមការងារគណបក្សសង្គ្រោះជាតិ ដឹកនាំដោយ លោក សុន ឆ័យ បានជួបពិភាក្សាគ្នាជាលើកទី២ នៅមន្ទីររដ្ឋសភា តែមិនមានលទ្ធផលនោះទេ៕ Cambodia News
