សេដ្ឋកិច្ចនៃតំបន់ចាយលុយអឺរ៉ូកំពុងងើបចេញពីវិបត្តិ
តួលេខ របស់ Eurostat ចេញផ្សាយ កាលពីថ្ងៃអង្គារ បង្ហាញថា វិស័យឧស្សហកម្ម ក្នុងតំបន់ចាយលុយអឺរ៉ូ ដែលបានធ្លាក់ចុះជាបន្តបន្ទាប់ជាច្រើនខែមកហើយនោះ បានចាប់ផ្តើមមានកំណើនឡើងវិញ កាលពីខែមិថុនាកន្លងទៅ។ តូលេខស្តីពីវិស័យឧស្សាហកម្មនេះត្រូវបានចេញផ្សាយមួយថ្ងៃ មុនតួលេខស្តីពីកំណើនសេដ្ឋកិច្ច ដែលត្រូវចេញផ្សាយ នៅថ្ងៃពុធនេះ។ គេរំពឹងថា កំណើនសេដ្ឋកិច្ចនៃតំបន់ចាយលុយអឺរ៉ូក៏ប្រហែលជាមានអត្រាកើនឡើងដែរ។
អស់រយៈពេល ជាច្រើនខែមកហើយ ដែលវិស័យឧស្សាហកម្មក្នុងតំបន់ចាយលុយអឺរ៉ូ មានការធ្លាក់ចុះជាបន្តបន្ទាប់។ កាលពីខែឧសភាកន្លងទៅ សកម្មភាពផលិតកម្មក្នុងតំបន់នេះ ធ្លាក់ចុះ ០,២% ហើយគេបានព្យាករថា វានឹងបន្តធ្លាក់ចុះ ០,៣%ទៀត នៅខែមិថុនា។ ក៏ប៉ុន្តែ នៅទីបំផុតទៅ តួលេខផ្លូវការបង្ហាញថា វិស័យឧស្សាហកម្មបែរជាបានកើនឡើងទៅវិញ នៅក្នុងខែមិថុនានេះ។
បើគិតតាមប្រទេសនីមួយៗ គេសង្កេតឃើញថា កំណើនផលិតកម្ម ដែលមានកម្រិតខ្ពស់ជាងគេ គឺមាននៅក្នុងប្រទេសអៀរឡង់ (៨,៧%) ហើយអាល្លឺម៉ង់ និងក្រិក មានកំណើន ២,៥%។ ផ្ទុយទៅវិញ វិស័យឧស្សាហកម្ម នៅក្នុងប្រទេសចាយលុយអឺរ៉ូខ្លះទៀត នៅតែបន្ត ធ្លាក់ចុះ ដូចជា នៅហូឡង់ (-៤,១%) ព័រទុយហ្កាល់ (-២,៨%) និងបារាំង (-១,៥%)។ ក៏ប៉ុន្តែ បើគិតជាមធ្យម នៅក្នុងតំបន់ចាយលុយអឺរ៉ូទាំងមូល ផលិតកម្ម នៅក្នុងខែមិថុនានេះ បានកើនឡើងរហូតដល់ទៅ ០,៧% ដែលជាកំណើនមួយខ្ពស់ហួសពីការស្មាន។
តួលេខនៃវិស័យឧស្សាហកម្មនេះត្រូវបានចេញផ្សាយមួយថ្ងៃមុន តួលេខស្តីពីផលិតផលក្នុងស្រុកសរុប ដែលត្រូវចេញផ្សាយ នៅថ្ងៃពុធនេះ។ គេរំពឹងថា ផលិតផលក្នុងស្រុកសរុប នៃតំបន់ចាយលុយអឺរ៉ូ ក៏ប្រហែលជាមានការកើនឡើងដែរ សម្រាប់ត្រីមាសទី២នេះ បន្ទាប់ពីមានការកើនឡើង ០,២% កាលពីត្រីមាសទី១កន្លងទៅ។
អ្នកជំនាញខាងសេដ្ឋកិច្ចជាច្រើនបានអះអាងថា គ្រប់តួលេខទាំងអស់សុទ្ធតែបង្ហាញថា អឺរ៉ុបកំពុងតែធ្វើដំណើរក្នុងទិសដៅជាវិជ្ជមានមួយ។ តួលេខដែលគួរឲ្យគេមានសុទិដ្ឋិនិយមមួយទៀត គឺចំនួនអ្នកអត់ការងារធ្វើ នៅក្នុងតំបន់ចាយលុយអឺរ៉ូ ដែលបានធ្លាក់ចុះជាលើកទីមួយ ចាប់តាំងពីខែមេសា ឆ្នាំ២០១១មក។
តួលេខជាវិជ្ជមានអស់ទាំងនេះបានធ្វើឲ្យទីផ្សារហិរញ្ញវត្ថុ មានការកើនឡើងស្ទើរតែគ្រប់កន្លែង នៅអឺរ៉ុប កាលពីថ្ងៃអង្គារ។ តម្លៃលុយអឺរ៉ូវិញក៏មានការកើនឡើងដែរ បើធៀបនឹងលុយដុល្លារអាមេរិក។
ក៏ប៉ុន្តែ ទោះជាយ៉ាងណា អ្នកជំនាញខាងសេដ្ឋកិច្ចក៏បានបង្ហាញនូវភាពប្រយ័ត្នប្រយែងផងដែរ ថា ថ្វីដ្បិតតែតំបន់ចាយលុយអឺរ៉ូកំពុងធ្វើដំណើរឆ្ពោះទៅរកច្រកចេញ នៃវិបត្តិសេដ្ឋកិច្ច ក៏ប៉ុន្តែ មិនមែនមានន័យថា បានចេញផុតពីវិបត្តិហើយនោះទេ។ គេព្យាករថា បើគិតជាអត្រាប្រចាំឆ្នាំ សេដ្ឋកិច្ចនៃតំបន់ចាយលុយអឺរ៉ូ នឹងនៅតែធ្លាក់ចុះដដែល ក្នុងឆ្នាំ២០១៣នេះ មុននឹងអាចកើនឡើង នៅឆ្នាំ២០១៤៕ដោយ សេង ឌីណា (RFI)
