ទាហានបារាំងត្រូវជនមិនស្គាល់មុខលួចចាក់ក ក្នុងពេលដើរល្បាត
បន្ទាប់ពីទាហានអង់គ្លេស ទាហានបារាំង បានធ្លាក់ខ្លួនរងគ្រោះដោយការប៉ុនប៉ងសម្លាប់របស់ជនមិនស្គាល់មុខ។ កាលពីល្ងាចថ្ងៃសៅរ៍ម្សិលមិញ ជនមិនស្គាល់មុខម្នាក់បានលួចចាក់ ក ទាហាន ប្រឆាំងអំពើភេរវកម្មម្នាក់ ដែលកំពុងដើរល្បាត នៅក្នុងស្ថានីយ៍រថភ្លើង ដ៏រវល់ មួយក្នុងសង្កាត់ពាណិជ្ជកម្មរបស់ក្រុងប៉ារីស។
តាមរដ្ឋអាជ្ញា បារាំង ជនមិនស្គាល់មុខបានលួចចាក់ពីក្រោយ លើកទាហានល្បាតបារាំង មុននឹងរត់គេចខ្លួន បន្លំចូលក្នុងហ្វូងមនុស្សដ៏កុះករក្នុងមជ្ឈមណ្ឌលពាណិជ្ជកម្ម។ ទាហានម្នាក់នោះបានរងរបួសដាច់សាច់ ប៉ុន្តែ មិនមានគ្រោះថ្នាក់ដល់ជីវិតទេ បន្ទាប់ពីត្រូវបានក្រុមជួយសង្រ្គោះអន្តរាគមភ្លាមៗ និងបញ្ជូនទៅកាន់មន្ទីរពេទ្យយោធា ក្បែរនោះ។
នៅព្រឹកនេះ ការិយាល័យប្រយុទ្ធប្រឆាំងអំពើភេរវកម្មរបស់ រដ្ឋអាជ្ញាបារាំងបានបើកការស៊ើបអង្កេត ជាបន្ទាន់។ បើតាមរូបភាពរបស់កាម៉េរ៉ាវីដេអូ តួ្រតពិនិត្យ ដែលគេដាក់នៅក្នុងស្ថានីយ៍រថភ្លើង ជនសង្ស័យជាមនុស្សមាឌធំ មានពុកមាត់។ ជនសង្ស័យបានដោះបោះចោលរ៉ូបបែបអ៊ីស្លាម របស់ខ្លួន និងរត់គេច ទៅបន្លំខ្លួនក្នុងហ្វូងមនុស្ស។
ជាមួយ នឹងទាហានពីរនាក់ផ្សេងទៀត នាយទាហានCedric Cordier អាយុ ២៣ឆ្នាំ ត្រូវជនមិនស្គាល់មុខលួចចាក់ ក្នុងពេលបំពេញការងារល្បាតរបស់ខ្លួន ជាប្រចាំ ក្នុងក្របខណ្ឌយុទ្ធនាការប្រឆាំងអំពើភេរវកម្មក្នុងទីក្រុងប៉ារីស។ សម្រាប់រដ្ឋមន្រ្តីការពារជាតិបារាំង លោកJean Yves Le Drian នាយទាហានបារាំងត្រូវគេចាក់សម្លាប់ ដោយសារតែការងារជាទាហានរបស់ខ្លួន។
រដ្ឋមន្រ្តីក្រសួងមហាផ្ទៃបារាំងវិញ មានប្រតិកម្មយ៉ាងប្រុងប្រយ័ត្ន ដោយមិនទាន់ហ៊ានភ្ជាប់ការវាយប្រហារទៅលើទាហានបារាំងលើកនេះ ទៅនឹងករណីកាប់សម្លាប់ទាហានអង់គ្លេស ដែលបង្កឡើងដោយជនអ៊ីស្លាមជ្រុលនិយមពីរនាក់ក្នុងទីក្រុងឡុងដ៍ កាលពីដើមសប្តាហ៍នេះ។
ហេតុការណ៍លើកនេះ ធ្វើឲ្យគេនឹកទៅដល់យុវជនអ៊ីស្លាមជ្រុលនិយមMohamed Merah ដែល ក្នុងនាមពួកអ៊ីស្លាមជ្រុលនិយមJihad បានសម្លាប់ទាហានបារាំងបីនាក់ នៅខេត្តToulouse។ មានការបារម្ភ ដែលថា យុវជន មួយចំនួន បានលុងជឿមនោគមវិជ្ជារបស់ក្រុមអ៊ីស្លាមជ្រុលនិយម និងធ្វើសកម្មភាពប្រឆាំងនឹងអាជ្ញាធរ ក្នុងបុព្វហេតុអ្នកកាន់សាសនាអ៊ីស្លាម ដែលបើតាមពួកគេ កំពុងរងគ្រោះដោយវត្តមានទាហានរបស់ក្រុមប្រទេសលោកខាងលិច។
ជនល្មើស ប្រភេទMohamed Merah ឬក៏ជនដៃដល់សម្លាប់ទាហានអង់គ្លេសនេះ អាចធ្វើសកម្មភាពដោយចំណង់ចិត្តខ្លួនឯង ដោយគ្មានពាក់ព័ន្ធ ឬបានទទួលចំណាត់តាំងបញ្ជាពីបណ្តាញក្រុមភេរវកម្មណាមួយទេ ដែលភាសាបារាំងហៅថា les loups solitaires៕ដោយ ឈាង បុប្ផា(RFI)