លោក ថេន សេន ប្រកាសថាមិនត្រៀមខ្លួនជាបេក្ខជន សំរាប់ការបោះឆ្នោតឆ្នាំ ២០១៥
ប្រធានាធិបតីភូមា ថេន សេន បានប្រកាសអោយដឹង កាលពីថ្ងៃសុក្រម្សិលមិញនេះថា លោកមិនបានត្រៀមខ្លួនដើម្បីឈរឈ្មោះជាបេក្ខជនប្រធានាធិបតី សំរាប់ការបោះឆ្នោត ក្នុងឆ្នាំ ២០១៥ ខាងមុខនោះទេ។ លោកបានបន្ថែមទៀតរថា លោកក៏មិនជំទាស់នឹងបេក្ខភាពរបស់លោកស្រី អ៊ុងសាន សូជី មកពីគណបក្សប្រឆាំងនោះដែរ។ គួររំលឹកថា លោកថេន សេន បានឡើងកាន់កាប់ភូមា ក្រោយការរំលាយចោលរបបសឹកភូមា កាលពីខែ មិនា ដើមឆ្នំា ២០១១។ លោកបានអនុវត្តនយោបាយកំណែទម្រង់ជាច្រើន រហូតធ្វើឲ្យសហគមន៍អន្តរជាតិមានការភ្ញាក់ផ្អើល និងចាប់អារម្មណ៍ខ្លាំង។
នៅក្នុង កិច្ចសម្ភាសជាមួយស្ថានីយទូរទស្សន៍បារាំង France 24 លោក ថេន សេន បានបន្តបង្ហាញនូវជំហរប្រជាធិបតេយ្យរបស់លោក ដោយប្រកាសថា លោកមិនត្រៀមខ្លួនធ្វើជាបេក្ខជនប្រធានាធិបតី សំរាប់ការបោះឆ្នោត២០១៥នោះទេ ថែមទាំងមិនជំទាស់បេក្ខភាពរបស់មេដឹកនាំគណបក្សប្រឆាំង គឺលោកស្រី អ៊ុងសាន ស៊ូជី ទៀតផង។
នេះជាដំណឹង ល្អសំរាប់ គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុងសាន ស៊ូជី។ គណបក្សនេះធ្លាប់ទទួលជោគជ័យក្នុងការបោះឆ្នោតរើសសមាជិកសភា បន្ថែម កាលពីខែមេសា ឆ្នាំ២០១២ ដោយទទួលបានអាសនៈ៤៣ ក្នុងចំណោមអាសនៈសរុប៤៤។
ប៉ុន្តែ បញ្ហានៅពេលនេះគឺថា លោកស្រី អ៊ុងសាន ស៊ូជី គឺជាភរិយារបស់ជនជាតិអង់គ្លេសម្នាក់ ដែលបានស្លាប់បាត់បង់ជីវិតទៅហើយ។ លោកស្រីមានកូនពីរនាក់ ជាមួយជនជាតិអង់គ្លេសរូបនេះ។ យោងតាមរដ្ឋធម្មនុញ្ញភូមា ជនជាតិភូមាដែលរៀបការជាមួយជនបរទេស រឺក៏មានកូនជាមួយជនបរទេស មិនអាចឈរឈ្មោះជាបេក្ខជនប្រធានាធិបតីនោះទេ។ ប៉ុន្តែ ប្រធានាធិបតី ថេន សេន បានប្រាប់ថា អ្វីៗគឺស្ថិតនៅលើការសំរេចរបស់សភា ហើយលោកគ្មានអ្វីជំទាស់បេក្ខភាពលោកស្រីអ៊ុងសាន ស៊ូជី នោះទេ។
ដោយឡែក ការចោទប្រកាន់ពីសមាគមសិទ្ធិមនុស្ស Human Rights Watch ថារដ្ឋាភិបាលភូមាបានធ្វើការបោសសំអាតកំចាត់ជនជាតិភាគតិច រ៉ូហ៊ីងយ៉ាសដែលកាន់សាសនាអ៊ីស្លាមនោះ ត្រូវបានលោក ថេន សេន បរិហារទៅវិញថា ជាការឃោសនាមួលបង្កាច់រដ្ឋាភិបាលលោក៕ដោយ ព្រំ សឿន សូលីណា (RFI)
