តំណាងរាស្ត្រគណបក្សប្រឆាំង ព្រមានពីការរំលាយចោលរដ្ឋសភាមុននីតិកាល
Cambodia News
ភ្នំពេញ៖ កាលពីថ្ងៃទី១៨ មិថុនា គណបក្សសង្គ្រោះជាតិ បានស្នើក្រុមប្រឹក្សាធម្មនុញ្ញ បញ្ជាក់ពីអធម្មនុញ្ញភាពនៃសេចក្តីសម្រេចរបស់គណៈកម្មាធិ ការអចិន្ត្រៃយ៍នៃរដ្ឋសភា ក្នុងការបង្កកប្រាក់បំណាច់តំណាងរាស្ត្រគណបក្សសមរង្ស៊ី គណបក្សសិទ្ធិមនុស្ស និងគណបក្សនរោត្តម រណឫទ្ធិ។
ក្នុងលិខិតមួយ ចុះកាលបរិច្ឆេតនៅថ្ងៃទី១៧ ខែមិថុនា ផ្ញើទៅកាន់ប្រធានក្រុមប្រឹក្សាធម្មនុញ្ញ លោក ឯក សំអុល គណបក្សសង្គ្រោះជាតិ លើកឡើងថា ការបណ្តេញចេញតំណាងរាស្ត្រចំនួន២៩រូប មិនគោរពតាមគោលការណ៍ច្បាប់ ដែលមានជាធរមាន។
លិខិតបន្តថា ការបណ្តេញចេញនេះ ក៏បំពានលើគោលការណ៍ច្បាប់រដ្ឋធម្មនុញ្ញមាត្រា៩៥ ដោយពុំអនុញ្ញាតឲ្យមានការដកចេញ ឬជ្រើសតាំងជំនួសនូវសមាជិករដ្ឋសភាណា ដែលប្រាសចាកសមាជិកភាពតិចជាង៦ខែ មុនចប់នីតិកាលនោះ។
គណបក្សសង្គ្រោះជាតិ បានចាប់ផ្តើមប្រមូលស្នាមមេដៃពីប្រជាពលរដ្ឋឲ្យបាន ២ម៉ឺននាក់ ទូទាំងប្រទេស ដើម្បីស្នើឲ្យរដ្ឋសភាប្រគល់អភ័យឯកសិទ្ធិជូនតំណាងរាស្ត្រ ២៨រូប របស់គណបក្សប្រឆាំងឡើងវិញ ឲ្យបានមុនយុទ្ធនាការបោះឆ្នោតថ្នាក់ជាតិ ដែលនឹងចាប់ផ្តើមនៅថ្ងៃទី២៧ ខែមិថុនានេះ។
លោក យឹម សុវណ្ណ អ្នកនាំពាក្យគណបក្សសង្គ្រោះបានឲ្យជាតិ ថា គិតត្រឹមតែមួយថ្ងៃចន្ទម្សិលមិញនេះ គណបក្សសង្គ្រោះជាតិ ប្រមូលស្នាមមេដៃពីប្រជាពលរដ្ឋនៅខេត្តកំពង់ស្ពឺ បានចំនួនជាង៣ពាន់នាក់ ហើយក្រុមការងាររបស់លោក នឹងបន្តប្រមូលឲ្យបានគ្រប់ចំនួន ២ម៉ឺនស្នាមមេដៃ ដើម្បីដាក់ជូនរដ្ឋសភាមុនការឃោសនាបោះឆ្នោតខាងមុខនេះ។
គួរបញ្ជាក់ថា តំណាងរាស្ត្រគណបក្សសិទ្ធិមនុស្ស និងតំណាងរាស្ត្រគណបក្សសមរង្ស៊ី សរុបចំនួន២៨រូប ត្រូវបានរដ្ឋសភាបណ្តេញចេញពីតួនាទី កាលពីដើមខែមិថុនានេះ ដោយសំអាងថា ពួកគេបានទៅចូលរួមជាមួយគណបក្សសង្គ្រោះជាតិ។ ប៉ុន្តែក្រុមសង្គមស៊ីវិលជាតិ និងអន្តរជាតិ រិះគន់ថា រដ្ឋសភាកម្ពុជានៅគ្រានេះ កំពុងដាក់ឲ្យស្ថិតក្នុងវិបត្តិធម្មនុញ្ញភាព ឬមិនស្របរដ្ឋធម្មនុញ្ញ ឬសភាត្រូវបានរំលាយមុនចប់អាណត្តិ៕