រដ្ឋាភិបាលដាក់ពន្ធ ១០ ភាគរយលើសេវាហិរញ្ញវត្ថុ
សារព័ត៌មាន Cambodia News/
ភ្នំពេញ (០៨ មិថុនា ២០១៧) ៖ ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះបានចេញប្រកាសមួយស្តីពីការណែនាំអនុវត្តអាករលើតម្លៃបន្ថែម ហើយបញ្ជាក់ថា សេវាហិរញ្ញវត្ថុមួយចំនួនត្រូវបង់ VAT ១០ ភាគរយ។
អ្នកជំនាញហិរញ្ញវត្ថុប៉ាន់ស្មានថាចំណូលសរុបរបស់គ្រឹះស្ថានហិរញ្ញវត្ថុ មានធនាគារ និងមីក្រូហិរញ្ញវត្ថុបានពីកម្រៃសេវា និង សោហ៊ុយបូកបញ្ចូលគ្នាមានប្រមាណ ៣០០ លានដុល្លារ ក្នុងមួយឆ្នាំនោះមានន័យថា រដ្ឋាភិបាលអាចប្រមូលអាករពីសេវាទាំងនេះប្រមាណ៣០លានដុល្លារក្នុងមួយឆ្នាំ។ VAT ជាអាករដែលត្រូវគិតទៅលើអ្នកប្រើប្រាស់។
ក្រសួង សេដ្ឋកិច្ច និងហិរញ្ញវត្ថុ កាលពីថ្ងៃទី ២៥ ឧសភា បានចេញប្រកាសមួយបញ្ជាក់ពីការអនុវត្តអាករលើតម្លៃបន្ថែម VAT ដែលបានក្នុងនោះបានកំណត់ថាសេវាហិរញ្ញវត្ថុដែលមិនជាប់ VAT ជាសេវាហិរញ្ញវត្ថុមូលដ្ឋានដែលកំណត់តែប្រតិបត្តិការទទួលប្រាក់បញ្ញើ និងផ្តល់ឥណទាន ប៉ុន្តែមិនរួមបញ្ចូលកម្រៃសេវាផ្សេងៗទៀតនោះទេ។
តាមរបាយការណ៍ហិរញ្ញវត្ថុឆ្នាំ ២០១៦ ក្នុងចំណោមប្រភពចំណូលជាច្រើនប្រភេទ ធនាគារអេស៊ីលីដា បានទទួលចំណូលពីកម្រៃសេវា និងសោហ៊ុយសរុប ៥២,៨ លានដុល្លារ។ ក្នុងន័យនេះបើគិតពន្ធលើតម្លៃបន្ថែម ១០ភាគរយ មានន័យថា រដ្ឋនឹងទទួលបានចំណូលពី VAT ពីអេស៊ីលីដាជិត ៥,៣ លានដុល្លារកាលពីឆ្នាំមុន។ នៅក្នុងត្រីមាសទីមួយឆ្នាំ ២០១៧ នេះអេស៊ីលីដា ទទួលបានចំណូលពីកម្រៃសេវា និងសោហ៊ុយជិត ១៥ លានដុល្លារ៕
