មណ្ឌលសុខភាពស្រុកបរិបូណ៌យកតម្លៃព្យាបាលជំងឺខ្ពស់
មណ្ឌលសុខភាពស្រុកបរិបូណ៌ ខេត្តកំពង់ឆ្នាំង ត្រូវបានប្រជាពលរដ្ឋប្រតិកម្មចំពោះ ការយកកម្រៃសេវាព្យាបាលក្នុងតម្លៃខ្ពស់ជាងមន្ទីរពេទ្យឯកជន ជាពិសេសគឺសេវាថែទាំសុខភាពស្ត្រីមានផ្ទៃពោះ និងឆ្លងទន្លេ។
លោក ឡឹក គឹមឡាយ មេឃុំពន្លៃ បានឲ្យដឹងថា ប្រជាពលរដ្ឋជាច្រើននាក់ បានលើកឡើងថា តម្លៃសេវាព្យាបាលជំងឺជាទូទៅនៅមណ្ឌលសុខភាពស្រុកបរិបូណ៌ គឺមានតម្លៃខ្ពស់ដូចសេវាសុខភាពឯកជន ដែលមិនអាចឲ្យពួកគាត់ទទួលយកបាន។
អ្នកស្រី ភិន ចន្ទនី ប្រធានផ្នែកឆ្មបនៃមណ្ឌលសុខភាពស្រុកបរិបូណ៌ បាននិយាយថា ចំពោះបញ្ហានេះ មណ្ឌលសុខភាពមិនបានយកកម្រៃសេវាលើសពីរដ្ឋកំណត់ទេ។ ប៉ុន្តែ តម្លៃដែលលើសនេះ អាចជាសេវាថែទាំក្រៅផ្លូវការរបស់ឆ្មបខាងក្រៅមណ្ឌលសុខភាព ដោយមានការព្រមព្រៀងគ្នា រវាងពេទ្យឆ្មប និងសាមីខ្លួន ដែលពុំមែនជាបន្ទុកទទួលខុសត្រូវរបស់មណ្ឌលសុខភាពនោះទេ៕