កម្ពុជា-អាមេរិក ធ្វើសមយុទ្ធឆ្មាំអង្គររួមគ្នា ពីថ្ងៃទី ១៦-២៩ ឧសភា
Cambodia News
ភ្នំពេញ៖ សហរដ្ឋអាមេរិកនិងរាជរដ្ឋាភិបាលកម្ពុជា នឹងចូលរួមក្នុងលំហាត់សមយុទ្ធយោធារួមគ្នា ដែលមានឈ្មោះថា ឆ្មាំអង្គរ ចាប់ពីថ្ងៃទី ១៦ ដល់ថ្ងៃទី ២៩ ខែឧសភា ឆ្នាំ២០១៣ នៅខេត្តកំពង់ស្ពឺ។
យោងតាមសេចក្តីប្រកាសព័ត៌មានរបស់ស្ថានទូតអាមេរិក ប្រចាំកម្ពុជានៅថ្ងៃទី១៥ ខែឧសភា ឆ្នាំ២០១៣ បានឲ្យដឹងថា ឆ្មាំអង្គរឆ្នាំ ២០១៣ គឺជាលំហាត់សមយុទ្ធទ្វេភាគីធំមួយ ដែលជាការបន្តការខិតខំប្រឹងប្រែងលើរយៈពេលច្រើនឆ្នាំ របស់កងកម្លាំងទ័ពសហរដ្ឋអាមេរិកប្រចាំនៅតំបន់ប៉ាស៊ីហ្វិក និងបញ្ជា ការដ្ឋានសហរដ្ឋអាមេរិកប្រចាំតំបន់ប៉ាស៊ីហ្វិក ដើម្បីចូលរួមឲ្យបានសកម្មជាមួយកងយោធពលខេមរភូមិន្ទ ហើយពង្រីកប្រតិបត្តិការថែរក្សាស្ថេរភាព និងសន្តិភាព។
នៅក្នុងលំហាត់សមយុទ្ធឆ្មាំអង្គរគឺជាលំហាត់សមយុទ្ធទ្វេភាគី ប្រចាំឆ្នាំ ដែលឧបត្ថម្ភដោយកងកម្លាំងទ័ពសហរដ្ឋអាមេរិកប្រចាំនៅតំបន់ប៉ាស៊ី ហ្វិក ដោយកងយោធពលខេមរភូមិន្ទធ្វើជាម្ចាស់ផ្ទះ។ លំហាត់សមយុទ្ធនេះកត់សំគាល់ខួបលើកទី ៤ នៃលំហាត់សមយុទ្ធប្រចាំតំបន់ប្រកបដោយផ្លែផ្កា និងមានអត្ថន័យយ៉ាងសំខាន់។
ឆ្មាំអង្គរឆ្នាំ ២០១៣ គឺជាលំហាត់សមយុទ្ធចុងក្រោយ ក្នុងចំណោមលំហាត់សមយុទ្ធដែលមានលក្ខណៈស្វិតស្វាញ និងច្រើន វិញ្ញាសារបន្តបន្ទាប់គ្នា ដែលមានធ្វើជាបន្ត ដើម្បីលើកកំពស់សន្តិភាព និងសន្តិសុខក្នុងតំបន់ នឹងមានការផ្លាស់ប្តូរបទពិសោធន៍គ្នាស្តីពីការងារតាមអង្គភាព តូចៗដែលធ្វើបានល្អ ក្នុងបេសកកម្មថែរក្សាសន្តិភាពរបស់អង្គការសហប្រជាជាតិ៕
