កាត់បន្ថយការឆ្លងមេរោគអេដស៍ដល់អ្នកប្រើប្រាស់គ្រឿងញៀនប្រភេទចាក់នៅឆ្នាំ២០១៥
ដោយ វត្តី
បច្ចុប្បន្ន អត្រាឆ្លងមេរោគអេដស៍នៅក្នុងចំណោមអ្នកប្រើប្រាស់គ្រឿងញៀនដោយចាក់នឹងម្ជុល សឺរ៉ាំងនៅមានការកើនឡើងនៅប្រទេសមួយចំនួនក្នុងពិភពលោក ដោយរួមទាំងប្រទេសកម្ពុជាផង។
របាយការណ៍របស់អង្គការសហប្រជាជាតិប្រយុទ្ធនឹងជំងឺអេដស៍ (UNIDS) ចេញផ្សាយឆ្នាំ ២០១៣ នេះបានបង្ហាញថា ការឆ្លងមានលក្ខណៈផ្សេងៗគ្នាពីប្រទេសមួយទៅប្រទេសមួយ ប៉ុន្តែចំណុចរួមគឺការប្រើម្ជុលសឺរ៉ាំងរួមគ្នា ហើយដោយសារឥទ្ធិពលនៃថ្នាំញៀនបានធ្វើឲ្យពួកគេរួមភេទជាមួយដៃគូច្រើនដោយមិនប្រើស្រោមអនាម័យ។
នៅក្នុងប្រទេសមួយចំនួន បើទោះជាអ្នកប្រើប្រាស់គ្រឿងញៀនដោយចាក់នឹងម្ជុលសឺរ៉ាំងមានចំនួនច្រើនក៏ដោយ ក៏ប្រទេសទាំងនោះមិនទាន់បានបង្ហាញពីការឆ្លើយតបឲ្យបានខ្លាំងក្លាចំពោះការកាត់បន្ថយការចម្លងមេរោគអេដស៍ថ្នាក់ជាតិនៅក្នុងចំណោមក្រុមគោលដៅនេះនៅឡើយទេ ដែលជាហេតុនាំឲ្យមានការលំបាក់ចំពោះការសម្រេចបានគោលដៅអភិវឌ្ឍន៍សហសត្សរ៍នាឆ្នាំ ២០១៥។ របាយការណ៍បន្តថា ដោយសារតែកង្វះការប្តេជ្ញាចិត្តក្នុងការរៀបចំកម្មវិធីនិងគោលនយោបាយឲ្យបានច្បាស់លាស់ក្នុងការកាត់បន្ថយការចម្លងមេរោគអេដស៍ថ្នាក់ជាតិនៅក្នុងចំណោមអ្នកប្រើប្រាស់គ្រឿងញៀននេះហើយ ទើបឲ្យប្រទេសទាំងនោះមិនមានទិន្នន័យជាក់លាក់ពាក់ពន្ធនឹងអ្នកប្រើប្រាស់គ្រឿងញៀន។
បើទោះជាអ្នកប្រើប្រាស់គ្រឿងញៀនដោយចាក់នឹងម្ជុលសឺរ៉ាំងមានចំនួនចន្លោះ ០,២% – ០,៤% នៃអត្រាប្រជាជនពិភពលោកក៏ដោយ ក៏ពួកគេមានផ្ទុកមេរោគអេដស៍ ហើយមានចំនួនចន្លោះ ៥% – ១០% នៃអត្រាប្រជាជនពិភពលោកដែរ។
អង្គការសហប្រជាជាតិប្រយុទ្ធនឹងជំងឺអេដស៍បានផ្តល់អនុសាសន៍ថា កញ្ចប់នៃការបង្ការ ការថែទាំ និងការផ្តល់សេវាព្យាបាលចាំបាច់ត្រូវតែធ្វើឡើងក្នុងការទប់ស្កាត់អត្រាឆ្លងថ្មីដល់អ្នកប្រើប្រាស់គ្រឿងញៀនដោយចាក់នឹងម្ជុលសឺរ៉ាំង។
អនុសាសន៍ទាំងនោះរួមមាន៖ ការធ្វើតេស្តឈាមរកមេរោគអេដស៍ ការផ្តល់ប្រឹក្សា ការផ្តល់ម្ជុលសឺរ៉ាំងអនាម័យគ្មានមេរោគតាមរយៈកម្មវិធីផ្តល់មម្ជុលសឺរ៉ាំងអនាម័យ ការអប់រំស្តីពីឥរិយាបទរួមភេទ ពិសេសការឆ្លងនិងចម្លងមេរោគអេដស៍ ការធ្វើឲ្យពួកគេងាយរកស្រោមអនាម័យបាន ការផ្តល់ឱសថជំនួសថ្នាំញៀន ការផ្តល់ថ្នាំប្រឆាំងមេរោគអេដស៍ និងការផ្តល់សេវាសុខភាពនិងសង្គមផ្សេងទៀត។
លោក ជួប សុខចំរើន នាយករងទទួលបន្ទុកប្រតិបត្តិការទូទៅរបស់អង្គការខាណាធ្លាប់បាននិយាយថា អ្នកប្រើប្រាស់ថ្នាំញឿននៅកម្ពុជាគឺស្ថិតនៅក្នុងក្រុមប្រឈមហានិភ័យខ្ពស់ចំពោះមេរោគអេដស៍និងជំងឺអេដស៍ ហើយអត្រាប្រេវ៉ាឡង់មេរោគអេដស៍ក្នុងចំណោមអ្នកប្រើប្រាស់ថ្នាំញឿនទូទៅមាន ៤.៤% និងអ្នកប្រើប្រាស់គ្រឿងញៀនដោយចាក់នឹងម្ជុលសឺរ៉ាំងមាន ២៥% ខណៈដែលការទទួលសេវាសុខភាពនិងសេវាផ្សេងៗទៀតរបស់ពួកគេនៅតែជួបឧបសគ្គ។
បើទោះជានៅមិនទាន់មានតួលេខពិតប្រាកដក៏ដោយ ក៏ការរកឃើញជាបឋមនៅក្នុងការធ្វើអង្កេតរួមមួយរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគរបស់ក្រសួងសុខាភិបាល និងអាជ្ញាធរជាតិប្រយុទ្ធប្រឆាំងគ្រឿងញៀនរបស់ក្រសួងមហាផ្ទៃ បានប៉ាន់ប្រមាណថា នៅកម្ពុជាមានអ្នកប្រើប្រាស់ថ្នាំញឿនពី ១៣.០០០ ទៅ ២៨.០០០ នាក់ ហើយនៅភ្នំពេញមានប្រហែលជា ១.៣០០ នាក់ដែលបានប្រើថ្នាំប្រភេទចាក់៕ អត្ថបទនេះផលិតឡើងក្រោមជំនួយសប្បុរសធម៌ពីប្រជាជនអាមេរិក តាមរយៈ USAID។ រាល់ខ្លឹមសារដែលមានក្នុងអត្ថបទនេះគឺជាការទទួលខុសត្រូវរបស់ អង្គការខាណា និងមិនបានឆ្លុះបញ្ចាំងទស្សនៈរបស់ USAID ឬរដ្ឋាភិបាលអាមេរិកឡើយ។
