ក្មេងស្ទាវមួយក្រុមជិះម៉ូតូប្រដេញគ្នា ទៅបុកគូទរថយន្ដរងរបួសធ្ងន់
ភ្នំពេញ ៖ កាលពីវេលាម៉ោង១និង៤០ នាទីយប់រំលងអាធ្រាត្រឈានចូលថ្ងៃទី០៤ ខែមីនា ក្មេងស្ទាវមួយក្រុមជិះម៉ូតូ ប្រដេញគ្នាទៅបុកគូទរថយន្ដមួយគ្រឿង បណ្ដាលឱ្យរងរបួស ធ្ងន់ ត្រូវបានបញ្ជូនទៅ កាន់មន្ទីរពេទ្យភ្លាមៗ។
មុនពេលកើតហេតុ គេបានឃើញក្រុមក្មេងស្ទាវចំនួន២ ម៉ូតូ មួយគ្រឿងម៉ាក ហ្វីណូ ជិះគ្នា៣នាក់ ពាក់ស្លាកលេខភ្នំពេញ 1T-5945 និងមួយ គ្រឿងទៀត ម៉ាកស្កុបពី បានជិះប្រដេញគ្នា យ៉ាងលឿន នៅលើកំណាត់ផ្លូវព្រះស៊ីសុវត្ថិ លុះដល់ចំណុចកើតហេតុ កែងផ្លូវលេខ១១៨ ពួកគេបានបុករថយន្ដម៉ាកអាតូសមួយគ្រឿង បណ្ដាលឱ្យដួល ក្រងាប់ច្រងិល រងរបួសធ្ងន់តែម្តង។
យ៉ាងណាក៏ដោយ អត្ដសញ្ញាណក្រុម ក្មេងស្ទាវទាំងនេះ មិនទាន់មានការបញ្ជាក់ នៅឡើយទេ ហើយអ្នកបើករថយន្ដមិនទាន់ ស្គាល់ឈ្មោះផងដែរ ។ ក្រោយកើតហេតុ ម៉ូតូរបស់ជនរងគ្រោះ ត្រូវបានសមត្ថកិច្ចយកទៅរក្សាទុក ដើម្បី ចាត់ការបន្ដទៀត ៕ ហេង នាង
