រថយន្តមួយគ្រឿង បើកបុកស្តូបវិញ្ញាណក្ខន្ធវិរបុរសនៅវិមានឯករាជ្យ
ភ្នំពេញ៖ កាលពីវេលាម៉ោង២៣និង៤០នាទីយប់ ថ្ងៃទី២០ ខែកុម្ភៈ រថយន្តមួយគ្រឿង បើកបរដោយបុរសម្នាក់ តាមបណ្ដោយវិថីព្រះនរោត្តម ស្រាប់តែរេចង្កូត បុកស្តូបវិញ្ញាណក្ខន្ធវិរបុរស នៅវិមានឯករាជ្យពេញទំហឹង ស្ថិតក្នុងសង្កាត់ចតុមុខ ខណ្ឌដូនពេញ ។
យោងតាមសាក្សីដែលបានឃើញហេតុការណ៍នៅកន្លែងកើតហេតុបានឲ្យដឹងថា រថយន្តបង្កខាងហេតុខាងលើនេះម៉ាកមែកសឺដេសពណ៌ខ្មៅ ពាក់ស្លាកលេខ ភ្នំពេញ 2H-2261 បើកបរដោយបុរសម្នាក់តាមបណ្ដោយវិថីព្រះនរោត្តម ទិសដៅពីជើងទៅត្បូង ក្នុងល្បឿនយ៉ាងលឿនលុះមកដល់ចំណុចកើតហេតុស្រាប់តែរថយន្តរេចង្កូត មកបុកស្តូបវិញ្ញាណក្ខន្ធវិរបុរស នៅវិមានឯករាជ្យ បណ្ដាលឲ្យបាក់អស់មួយចំនួន ហើយរថយន្តជិះរត់គេចខ្លួនដោយយករថយន្តទៅទុកនៅយានដ្ឋានមួយកន្លែង ទល់មុខកាហ្វេមណ្ឌលគិរី ជិតផ្សារទំនើបសូរិយា។
ក្រោយមកសមត្ថកិច្ចបានរករថយន្តបង្កហេតុឃើញនៅក្នុងទីតាំង ខាងលើ ក៏ធ្វើការឃាត់ទុកហើយស្ទូចយករថយន្តទៅរក្សាទុកនៅការិយាល័យជំនាញ ដើម្បីចាត់ការតាមផ្លូវច្បាប់៕ ហេង នាង
