យុវជន ២នាក់ជិះម៉ូតូទៅបុករថយន្តក្រឡុកស៊ីម៉ង់ត៍រងរបួសធ្ងន់ធ្ងរ
ភ្នំពេញ៖ កាលពីវេលាម៉ោង១៩ និង១០នាទី យប់ថ្ងៃទី៧ ខែកុម្ភៈ យុវជនពីរនាក់ បងប្អូនជិះម៉ូតូឌុបគ្នា ក្នុងល្បឿនលឿន ជ្រុលចង្កូត ទៅបុករថយន្ត ក្រឡុកស៊ីម៉ង់ត៍ បណ្តាលឲ្យរងរបួសធ្ងន់ធ្ងរទាំងពីរនាក់ ស្ថិតនៅលើកំណាត់ ផ្លូវជាតិលេខ៤ ភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
សាក្សីនៅកន្លែងហេតុ បានឲ្យដឹងថា រថយន្តដែល ម៉ូតូជ្រុលទៅបុកនោះ ម៉ាកនីស្សាន់ឌីសែល ពណ៌ខៀវ ពាក់ស្លាកលេខ ភ្នំពេញ 3A-3001ជារថយន្តក្រឡុក ស៊ីម៉ង់ត៍ អ្នកបើកបរគេចខ្លួន បាត់បន្ទាប់ពីកើតហេតុ ។ ចំណែកឯម៉ូតូដែលបើកជែងគេ ជ្រុល ទៅបុករថយន្តម៉ាកសេ១២៥ពណ៌ខ្មៅស៊េរីឆ្នាំ២០០៦ ពាក់ ស្លាកលេខភ្នំពេញ1I-7639 បើកបរដោយបុរសឈ្មោះ ឡឹក លីម ហៅលៀប អាយុ៣៣ឆ្នាំ មុខរបរបុគ្គលិក ក្រុមហ៊ុន ហុងដានិងអ្នករួមដំណើរឈ្មោះ ឡឹក ល័ក្ខ អាយុ២២ឆ្នាំ ត្រូវជាបងប្អូន មានទីលំនៅភូមិត្រពាំងទួល ឃុំសំរោងលើ ស្រុកអង្គស្នួល ខេត្តកណ្ដាល ។
មុនពេលកើតហេតុ ជនរងគ្រោះទាំងពីរនាក់ ជិះម៉ូតូ មួយគ្រឿងឌុបគ្នា ក្នុងទិសដៅពី កើតទៅលិច ចំណែក ឯរថយន្តដឹកស៊ីម៉ង់ត៍ បើកបរបញ្រ្ចាសទិស ជាមួយជាមួយម៉ូតូលុះ ដល់ត្រង់ចំណុចកើតហេតុស្រាបតែម៉ូតូ វ៉ារថយន្តមួយគ្រឿង ដែលបើកបរស្របទិសគ្នា មិនបានមើលក៏ជ្រុល ចង្កូតទៅបុកជាមួយរថយន្តបុកជាមួយរថយន្តក្រឡុកស៊ីម៉ង់ត៍យ៉ាងពេញទំហឹងបណ្ដាលឲ្យអ្នកជិះម៉ូតូទាំងពីរនាក់ខ្ទាតចេញពីម៉ូតូ បោកទៅនឹងថ្នល់ រងរបួសធ្ងន់ ។
ក្រោយមកត្រូវបានរថយន្តសង្គ្រោះ ដឹកបញ្ជូនជនរងគ្រោះទាំងពីរទៅកាន់មន្ទីរព្រះកុសុមៈភ្លាមៗនោះគេឃើញ នគរបាលចរាចរ ខណ្ឌចុះទៅដល់កន្លែង កើតធ្វើការវាស់វែង និងយកវត្ថុតាងទាំងពីរយកមកកាន់ អធិការដ្ឋាន ដើម្បីចាត់ការទៅ តាមនីតិវិធីច្បាប់៕
ដោយ៖ ហេង នាង
