គណបក្សប្រជាជនលើកបង្ហាញសមិទ្ធផល ដែលសម្រេចបានក្នុងឆ្នាំ២០១២
ភ្នំពេញ៖ ក្នុងមីទ្ទិញរំឭកខួប លើកទី៣៤ នៃទិវាជ័យជំនះ ថ្ងៃ៧មករា នាព្រឹកថ្ងៃចន្ទ ទី៧ ខែមករា ឆ្នាំ២០១៣ ដែលប្រារព្ធធ្វើឡើងនៅទីស្នាក់ការកណ្តាលគណបក្សប្រជាជនកម្ពុជា គ៨៥ នៅរាជធានីភ្នំពេញ ប្រមុខគណបក្សកាន់អំណាច បានលើកបង្ហាញនូវសមិទ្ធផលឆ្នាំចាស់ និងប្រកាសចេញនូវគោលនយោបាយសំខាន់ៗ សម្រាប់ឆ្នាំថ្មី ឆ្នាំបោះឆ្នោត ឆ្នាំ២០១៣ខាងមុននេះ។
សមិទ្ធផលនានា ក្រោមការដឹកនាំដោយគណបក្សប្រជាជនកម្ពុជា ដែលសម្រេចបានក្នុងឆ្នាំ២០១២ ក្នុងរយៈកាលកន្លងមក គឺកម្ពុជារក្សាបាននូវស្ថិរភាពនយោបាយ ស្ថិរភាពសង្គម ស្ថិរភាពម៉ាក្រូសេដ្ឋកិច្ច ស្ថិរភាពហិរញ្ញវត្ថុ ការពារបានរឹងមាំនូវអធិបតេយ្យ បូរណភាពទឹកដី សន្តិសុខ និងសុវត្ថិភាពសង្គម ជាដើម។ ក្នុងនោះ ក៏បានបង្ហាញផងដែរ នូវកំណើនសេដ្ឋកិច្ច កំណែទម្រង់ឡូត៍នេសាទ ការវាស់វែងដីធ្លី និងជោគជ័យរបស់កម្ពុជា ក្នុងនាមជាប្រធានអាស៊ាន។
ដោយឡែក សម្រាប់គោលនយោបាយសំខាន់ៗ របស់គណបក្សប្រជាជនកម្ពុជា សម្រាប់ឆ្នាំ២០១៣ ដែលជាឆ្នាំបោះឆ្នោតជ្រើសតាំងសមាជិករដ្ឋសភា អាណត្តិទី៥ នៅខែកក្កដា ក៏ត្រូវបានលើកបង្ហាញផងដែរ ដោយគណបក្សប្រជាជនកម្ពុជា សន្យាខិតខំថែរក្សាសន្តិភាព ស្ថិរភាព សន្តិសុខ និងសណ្តាប់ធ្នាប់សង្គម ប្រឆាំងអំពើពុករលួយ ព្រមទាំងដោះស្រាយបញ្ហាព្រំដែន ដោយសន្តិវិធី៕
