រថយន្តពីរគ្រឿងបុកគ្នាខូចខាតផ្នែកខាងមុខ
ភ្នំពេញ៖ កាលពីវេលាម៉ោង៩និង១០នាទីព្រឹក ថ្ងៃទី៣ ខែមករា មានរថយន្តមួយគ្រឿង ចាប់ហ្វ្រាំងមិនទាន់ក៏ជ្រុលទៅបុកកាងដែកចំពាក់កណ្ដាល រថយន្តបាញ់បេតុងធុនធំមួយគ្រឿង បណ្ដាលឲ្យរថយន្ត រងការខូចខាតផ្នែកខាងមុខស្ទើរទាំងស្រុង ស្ថិតនៅតាមបណ្ដោយផ្លូវលេខ៣៦០កែងនិងផ្លូវលេខ១០៥ ស្ថិតក្នុងសង្កាត់បឹងកេងកងទី២ ខណ្ឌចំការមន។
មុនពេលកើតហេតុគេឃើញ រថយន្តមួយគ្រឿង ម៉ាកISUSU ពណ៌សលាយលឿង ពាក់ស្លាកលេខភ្នំពេញ5A-0491 ធ្វើដំណើរតាមបណ្ដោយផ្លូវលេខ៣៦០ ក្នុងទិសដៅពីលិចទៅកើតលុះពេលមកដល់ចំណុចផ្លូវកែងលេខ១០៥បំរុង នឹងបត់ស្ដាំ ស្រាប់តែមានរថយន្តមួយគ្រឿង ម៉ាកកាមរីឆ្លាម ពាក់ស្លាកលេខភ្នំពេញ 2H-8377បើកបរដោយបុរសម្នាក់ក្នុងទិសដៅស្របគ្នាពេលនោះរថយន្តកាមរី ឆ្លាមចាប់ហ្វ្រាំមិនទាន់ក៏ជ្រុលទៅបុកកាងដែកចំពាក់កណ្ដាលរថយន្ត បាញ់បេតុងធុនធំនោះ បណ្ដាលឲ្យរថយន្តកាមរីឆ្លាម ធ្លាក់កាងខាងមុខនិងបែកស្តុប ។ ក្នុងហេតុការណ៍នេះ មិនមាននរណាម្នាក់បានរងរបួសឡើយ។
ក្រោយពេលកើតហេតុគេឃើញភាគីខាងរថយន្តបាញ់បេតុងធុនធំ នោះសងថ្លៃខូចខាតទៅឲ្យរថយន្តកាមរីឆ្លាមដោយយកទៅជួសជុលឲ្យ ដើម្បីដោះស្រាយបញ្ហា៕
