ជិះម៉ូតូលើផ្លូវបញ្ច្រាសទៅបុកម៉ូតូមួយគ្រឿងទៀតរងរបួសធ្ងន់ ៣នាក់
ភ្នំពេញ៖ នៅវេលាម៉ោង២និង១០នាទីរំលងអធ្រាត្រឈានចូល ថ្ងៃទី២៦ ធ្នូ ម៉ូតូ២គ្រឿងបុកគ្នា បណ្តាលឲ្យរងរបួសធ្ងន់ទាំង៣នាក់ និងខូចខាត ម៉ូតូយ៉ាងដំណំទាំងពីរគ្រឿង ស្ថិតនៅតាមមហាវិថីព្រះមុនីវង្ស មុខភោជនីយដ្ឋានវុទ្ធីមនោរម្យ ១១១ ក្នុងសង្កាត់ផ្សារដើមថ្កូវ ខណ្ឌ ចំការមន ។
ប្រភពព័ត៌មានបានឲ្យដឹងថា ម៉ូតូសេ១២៥ ស៊េរី២០១១ ពណ៌ខ្មៅ ជិះគ្នា២នាក់ ស្រី១ ប្រុស១ ជិះលើផ្លូវបញ្ច្រាសទិសដៅចរាចរណ៍ពីកើតទៅលិចទៅបុកចំពីមុខម៉ូតូ វីវ៉ា១២៥ ពណ៌ខ្មៅ ជិះម្នាក់ឯង ពីលិចទៅកើត បណ្តាលឲ្យរងរបួសធ្ងន់ទាំង៣នាក់ និងខូចខាតម៉ូតូទាំងពីរគ្រឿងដូចគ្នា ។
ក្រោយពេលកើតហេតុជនរងគ្រោះខាងម៉ូតូសេ១២៥ ត្រូវមិត្តភក្កិដឹកតាមម៉ូតូយកទៅព្យាបាលនៅមន្ទីរពេទ្យ ។ ចំណែកអ្នកជិះម៉ូតូវីវ៉ា១២៥ ត្រូវរថយន្តសង្គ្រោះដឹកយកទៅព្យាបាលនៅគ្លីនិកឯកជន ។ ម៉ូតូទាំងពីរគ្រឿងត្រូវសមត្ថកិច្ចយកទៅរក្សាទុកនៅខណ្ឌចំការមន ៕
ដោយ៖ ហេង នាង
