សម្តេចតេជោ ស្វាគមន៍ចំពោះគណបក្សនយោបាយដែលបានចុះឈ្មោះប្រកួតក្នុងការបោះឆ្នោតថ្នាក់ជាតិ ២០១៨នេះ
សារព័ត៌មាន Cambodia News/
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី ០២ ខែឧសភានេះ ស្វាគមន៍ចំពោះគណបក្សនយោបាយដែលបានចុះឈ្មោះប្រកួតប្រជែងក្នុងការបោះឆ្នោតជ្រើសរើសតំណាងរាស្ត្រនីតិកាលទី ៦ខាងមុខ។
សម្តេចតេជោ មានប្រសាសន៍ថា កម្ពុជាកំពុងគោរព និងអនុវត្តន៍នូវលទ្ធិប្រជាធិបតេយ្យ ដែលគណបក្សនយោបាយតូចធំទាំងអស់ក្នុងប្រទេសមានសិទ្ធិ និងឱកាសចូលរួមប្រកួតប្រជែងនៅក្នុងការបោះឆ្នោតដោយសេរី។សម្តេច បញ្ជាក់ថា ថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៦ ក៏ជិតមកដល់។
សម្តេច ក៏សូមស្វាគមន៍ដល់គណបក្សនយោបាយទាំងអស់ដែលបានចុះបញ្ជីគណបក្សខ្លួន ព្រមទាំងបញ្ជីបេក្ខជនឈរឈ្មោះប្រកួតប្រជែងនៅក្នុងថ្ងៃបោះឆ្នោតថ្ងៃទី ២៩ ខែ កក្កដា ឆ្នាំ ២០១៨ ខាងមុខនេះ ដែលនេះគឺបង្ហាញអោយឃើញច្បាស់ថា កម្ពុជាកំពុងគោរពនិងអនុវត្តន៍នូវលទ្ធិប្រជាធិបតេយ្យ ដែលគណបក្សនយោបាយតូចធំទាំងអស់ក្នុងប្រទេសមានសិទ្ធិ និងឱកាសចូលរួមប្រកួតប្រជែងនៅក្នុងការបោះឆ្នោតដោយសេរី។
សម្តេចបានអរគុណដល់ប្រជាពលរដ្ឋ សមាជិក សមាជិការគណបក្សប្រជាជន និងយុវជនទូទាំងប្រទេសដែលមានជំនឿជឿជាក់លើការដឹកនាំរបស់សម្តេចហើយបន្តបោះឆ្នោតជូន គណបក្សប្រជាជន ដើម្បីសម្តេចមានឱកាសបន្តអភិវឌ្ឍន៍ប្រទេសជាតិអោយកាន់តែរុងរឿងរីកចម្រើនសំបូរសប្បាយ។
ការប្រកាសស្វាគមន៍របស់សម្តេចតេជោ ហ៊ុន សែននេះធ្វើឡើង ខណៈដែល គណៈកម្មការជាតិរៀបចំការបោះឆ្នោតហៅកាត់ គ ជ ប បានប្រកាសទទួលពាក្យពីគណបក្សនយោបាយដើម្បីឈឈ្មោះបោះឆ្នោត ជ្រើសតាំងតំណាងរាស្ត្រនីតិកាលទី៦ កាលពីថ្ងៃទី៣០ ខែ មេសា ។រយៈពេលពីរថ្ងៃនៃការចុះបញ្ជីគណបក្សនយោបាយឈឈ្មោះបោះឆ្នោត ជ្រើសតាំងតំណាងរាស្ត្រនីតិកាលទី៦ គឺមានគណបក្សចំនួន៣ បានចុះឈ្មោះ មានគណបក្ស យុវជនកម្ពុជា គណបក្សប្រជាជនកម្ពុជា និងគណបក្សសញ្ជាតិកម្ពុជា៕
