សម្ដេចធិបតី ហ៊ុន ម៉ាណែត ពន្យល់ពីអត្ថន័យនៃការដំឡើងប្រាក់ឈ្នួល ៤ដុល្លារ
សារព័ត៌មាន Cambodia News/
ភ្នំពេញ៖ ថ្លែងនៅក្នុងជំនួបជាមួយនឹងកម្មករជិត ២ម៉ឺននាក់ក្នុងរាជធានីភ្នំពេញព្រឹកថ្ងៃអង្គារ ទី៣ ខែតុលា ឆ្នាំ២០២៣ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានពន្យល់អំពីអត្ថន័យនៃការដំឡើងប្រាក់ឈ្នួល ៤ដុល្លារ ដល់កម្មករក្នុងឆ្នាំ២០២៤ ថាជាការដំឡើងក្នុងស្ថានភាពដែលពិភពលោកកំពុងតែលំបាកនិងគួរតែអបអរសាទរ។សម្ដេចធិបតី ហ៊ុន ម៉ាណែត បានបន្តថា ការដំឡើងនេះគឺដើម្បីចែកគ្នារស់ទាំងនិយោជកនិងនិយោជិត ដោយថាដើម្បីរក្សានូវលំនឹងនូវការវិនិយោគក៏ដូចជាទាក់ទាញនូវការវិនិយោគបន្ថែម។ ការដំឡើងច្រើនពេកនឹងធ្វើឲ្យកម្ពុជាបាត់បង់ការប្រកួតប្រជែងខណៈដែលប្រទេសដែលប្រកួតប្រជែងទីផ្សារជាមួយកម្ពុជាប្រាក់ខែរបស់កម្មកររបស់ពួកគេគឺនៅទាបនៅឡើយ។
សម្ដេចថា៖ «នេះគឺជាស្មារតីដែលយើងត្រូវរួមគ្នារស់តិចច្រើនយើងចែកគ្នារស់។ ថែរក្សាឆ្នាំងបាយបង្កើនអង្ករក្នុងឆ្នាំងនិងរកឱកាសដើម្បីពង្រីកបន្ថែមទៀតដើម្បីឲ្យមានការបើករោងចក្របន្ថែមទៀតដើម្បីបងប្អូនយើងមានការងារធ្វើ»។ សម្ដេចបានអរគុណដល់និយោជិត និងកម្មករដែលបានចូលរួមក្នុងការដំឡើងប្រាក់ខែនេះ។
សូមជម្រាបថា ប្រាក់ឈ្នួលអប្បបរមាកម្មករនិយោជិតសម្រាប់ឆ្នាំ២០២៤ ឡើងបាន ៤ដុល្លារ ពី ២០០ដុល្លារ ទៅ ២០៤ដុល្លារក្នុងមួយខែ។ ប្រាក់ឈ្នួលនេះនឹងអនុវត្តនៅដើមឆ្នាំ២០២៤។ នេះបើតាមលទ្ធផលកិច្ចប្រជុំសម្រេចចុងក្រោយរវាងភាគីសហជីព និយោជក និងតំណាងរាជរដ្ឋាភិបាលកាលពីថ្ងៃទី២៨ ខែកញ្ញា ឆ្នាំ២០២៣៕
