រដ្ឋាភិបាលផ្តល់តម្លៃថ្មី លើប័ណ្ណបើកបរយានយន្ត និងប្តូរ ពន្យារប័ណ្ណបើកបរគ្រប់ប្រភេទ
សារព័ត៌មាន Cambodia News/
ភ្នំពេញ (២៤ មករា ២០១៦) ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រួមទាំងរដ្ឋមន្ត្រីក្រសួងសាធារណការ និងដឹកជញ្ជូន បានចេញសេចក្តីសម្រេចរួមគ្នាមួយកាលពីថ្ងៃទី២១ ខែមករា ឆ្នាំ២០១៦ លើការផ្តល់សេវាសាធារណៈរបស់ក្រសួងសាធារណការ និងដឹកជញ្ជូនក្នុងនោះ រួមមាន៖ ការប្រឡងយកប័ណ្ណបើកបរយានយន្ត និងប្តូរ ពន្យារប័ណ្ណបើកបរ តម្លៃធ្វើស្លាកលេខម៉ូតូ រថយន្តថ្មី ជាដើម។
សេចក្តីសម្រេច បានឲ្យដឺងថា ការប្រឡងយកប័ណ្ណបើកបរទោចក្រយានយន្ត ប្រភេទ ក ( ម៉ូតូ ចាប់ពី ១២៦ CC ឡើងទៅ ) តម្លៃ ៣ម៉ឺនរៀល រយៈពេលផ្តល់សេវា ១០ ថ្ងៃ ( ថ្ងៃធ្វើការ ) មានសុពលភាព ១០ ឆ្នាំ។ ចំណែការប្រឡងយកប័ណ្ណបើកបរឡើងវិញ ទោចក្រយានយន្ត ប្រភេទ ក ( ប្រឡងឡើងវិញ ក្រោយពីប្រឡងលើកមុន ធ្លាក់ ) ត្រូវបង់ថ្លៃ ប្រឡងទ្រឹស្តី ៥ពាន់រៀល និងថ្លៃប្រឡងដៃចង្កូត ៧៥០០ រៀល។ ចំណែកការប្តូរ ពន្យារ ប័ណ្ណបើកបរទោចក្រយានយន្ត ប្រភេទ ក តម្លៃ ២ម៉ឺនរៀល។
ចំណែកការប្រឡងយកប័ណ្ណបើកបររថយន្តប្រភេទ ខ ( រថយន្តគ្រួសារ ៤ កៅអី ) តម្លៃ ៩ ម៉ឺនរៀល រយៈពេល ១០ ថ្ងៃ ( ថ្ងៃធ្វើការ ) មានសុពលភាពរយៈពេល ១០ ឆ្នាំ។ ប្រឡងយកប័ណ្ណបើកបរឡើងវិញ រថយន្តប្រភេទ ខ បង់ថ្លៃប្រឡងទ្រឹស្តី ២ម៉ឺនរៀល និងប្រឡងដៃចង្កូត ៣ម៉ឺនរៀល។
ប្រឡងយកប័ណ្ណបើកបររថយន្ត ប្រភេទ គ ឃ តម្លៃ ៩៥.០០០ រៀល។ ប្រឡងយកប័ណ្ណបើកបររថយន្ត ប្រភេទ ង តម្លៃ ១០ម៉ឺនរៀល។
ក្នុងនោះ រាល់ការប្តូរ ពន្យារប័ណ្ណបើកបររថយន្តគ្រប់ប្រភេទ តម្លៃ ៣ ម៉ឺនរៀល រយៈពេលផ្តល់សេវា ១០ ថ្ងៃ ( ថ្ងៃធ្វើការ )។ រីឯការបញ្ជាក់ប័ណ្ណបើកបរ ជាភាសាបរទេស តម្លៃ ២៥.០០០ រៀល៕
