បុរសដែលឆេះរលាកពេញខ្លួន ទទួលបានថវិកាឧបត្ថម្ភ១ម៉ឺនដុល្លារពីសម្តេចតេជោ និងសម្តេចកិតិ្តព្រឹទ្ធបណ្ឌិត
សារព័ត៌មាន Cambodia News/
ភ្នំពេញ (៩ ឧសភា ២០១៩) ៖ ជនរងគ្រោះមាន ឈ្មោះ ឃុត សំណាង ដែលត្រូវបានចាត់ទុកជាវីរបុរសបានជួយសង្គ្រោះក្មេងស្រីមួយរូប គេចចេញពីការផ្ទុះហ្គាសឆេះឡាន នៅក្រុងតាខ្មៅ បណ្តាលឱ្យគាត់ត្រូវឆេះរលាកភ្លើងពេញខ្លួន ស្ទើរបាត់បង់ជីវិត បានទទួលថវិកាឧបត្ថម្ភចំនួន១ម៉ឺនដុល្លារពីសម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត។
កាលពីថ្ងៃទី៨ ខែឧសភា ឆ្នាំ២០១៩ លោកស្រី ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ បានចុះសួរសុខទុក្ខបុរសរងគ្រោះ ព្រមទាំងនាំយកថវិការបស់សម្តេចតេជោហ៊ុន សែន និងសម្តេចកិតិ្តព្រឹទ្ធបណ្ឌិតចំនួន១ម៉ឺនដុល្លារជូនជនរងគ្រោះដោយផ្ទាល់។
ដោយសារតែទទួលបានព័ត៌មាន និងដោយក្តីអាណិតអាសូរដល់លោក ឃុត សំណាង ដែលជាវីរបុសជួយសង្គ្រោះក្មេងស្រី ទើបសម្តេចតេជោហ៊ុន សែន និងសម្តេចកិតិ្តព្រឹទ្ធបណ្ឌិតបានចាត់ឱ្យលោកស្រី ពេជ ចន្ទមុន្នី ហ៊ុនម៉ាណែត ចុះសាកសួរសុខទុក្ខដោយផ្ទាល់ និងនាំយកថវិកាមកប្រគល់ដល់ជនរងគ្រោះ។
ជនរងគ្រោះឈ្មោះ ឃុត សំណាង មានអាយុ៥៣ឆ្នាំ នៅភូមិកំពង់សំបួរ ស្រុកឯកភ្នំ ខេត្តបាត់ដំបង បច្ចុប្បន្នកំពុងសម្រាកព្យាបាលនៅមន្ទីរពេទ្យ ព-២ (អតីតពេទ្យយោធា) ក្រុងបាត់ដំបង។ កន្លងទៅ បើទោះបីជាធ្លាប់បានទទួលជំនួយជាបន្តបន្ទាប់ក្តី ប៉ុន្តែជនរងគ្រោះរូបនេះ នៅតែត្រូវការជំនួយបន្ថែម ព្រោះតែរបួសរលាកខ្លាំង ខណៈដែលជនរងគ្រោះ មិនចង់ឱ្យក្រុមគ្រួសារជំពាក់បំណុលធនាគារ ៕
