សម្តេចតេជោ ហ៊ុន សែន បញ្ជាក់ថា អាស៊ានពិតជាមានបំណងដេញថ្លៃធ្វើម្ចាស់ផ្ទះ World Cup
សារព័ត៌មាន Cambodia News/
ថ្ងៃចេញផ្សាយៈ June 15, 2022/
ភ្នំពេញ ៖ សម្ដេច ហ៊ុន សែន នាយករដ្ឋមន្ត្រីកម្ពុជាបានបញ្ជាក់ពីគោលបំណងដែលប្រទេសអាស៊ីអាគ្នេយ៍ចង់ដេញថ្លៃធ្វើជាម្ចាស់ផ្ទះរៀបចំការប្រកួតបាល់ទាត់ជើងឯកពិភពលោក (FIFA WORLD CUP) សម្រាប់ឆ្នាំ២០៣៤ ឬ ២០៣៨ខាងមុខ។
សម្តេចតេជោ ហ៊ុន សែន បានថ្លែងដូច្នេះក្នុងឱកាសអញ្ជើញជាអធិបតីក្នុងព្រឹត្តិការណ៍ដំណើរទេសចរណ៍ ពានរង្វាន់បាល់ទាត់ពិភពលោក (FIFA WORLD CUP) ឆ្លងកាត់ព្រះរាជាណាចក្រកម្ពុជាជាលើកដំបូងនាថ្ងៃទី១៥ ខែមិថុនា ឆ្នាំ២០២២នេះ នៅវិមានសន្តិភាព រាជធានីភ្នំពេញ។
សម្តេចតេជោ ហ៊ុន សែន មានប្រសាសន៍ឲ្យដឹងថា “សម្រាប់ឆ្នាំ២០២២នេះ ក្នុងនាមខ្ញុំជាប្រធានអាស៊ាន ខ្ញុំចង់ឃើញអាស៊ានមានចក្ខុវិស័យ និងផែនការដេញថ្លៃធ្វើម្ចាស់ផ្ទះ នៃការប្រកួតបាល់ទាត់ពិភពលោក នៅឆ្នាំ២០៣៤ ឬ២០៣៨ ដែលខ្ញុំនឹងពិនិត្យមើលលទ្ធភាព ស្នើសុំឲ្យបណ្តាប្រមុខរដ្ឋ ប្រមុខរដ្ឋាភិបាលអាស៊ានគាំទ្រ ជំរុញគំនិតផ្តួចផ្តើមនេះឲ្យក្លាយជាការពិត”។
គួរបញ្ជាក់ថា ពានរង្វាន់បាល់ទាត់ពិភពលោក FIFA World Cup Trophy បានដង្ហែមកដល់ប្រទេសកម្ពុជាហើយនៅព្រឹកថ្ងៃទី១៥ ខែមិថុនា ឆ្នាំ២០២២នេះតាមជើងយន្តហោះពិសេស ហើយនឹងដង្ហែទៅពហុកីឡដ្ឋានជាតិមរតកតេជោដើម្បីដាក់តាំងឲ្យមហាជនចូលទស្សនា ថតរូប ដូចជាមានការប្រគំតន្ត្រីដើម្បីអបអរសាទរផងដែរគិតចាប់ពីម៉ោង១រសៀលរហូតដល់ម៉ោង១០យប់៕
