សារព័ត៌មាន (TNAOT APP) ជូនម៉ាស់វេជ្ជសាស្ត្រចំនួន ៣០០០ម៉ាស់ ដល់ ក្លិបអ្នកកាសែតកម្ពុជា ​

សារព័ត៌មាន​ Cambodia News/

ភ្នំពេញ ៖ នាព្រឹកថ្ងៃទី២៣ ខែមេសា ឆ្នាំ២០២០នេះ ក្លិបអ្នកកាសែតកម្ពុជា (Club of Cambodian Journalists) បានទទួលអំណោយម៉ាស់វេជ្ជសាស្ត្រ ចំនួន ៣០០០ ពីសារព័ត៌មានត្នោត (TNAOT APP)។ ក្លិបអ្នកកាសែតកម្ពុជានឹងបន្តចែកចាយម៉ាស់នេះ ទៅសមាជិក សមាជិការរបស់ខ្លួន ដើម្បីជួយការពារពួកគេពីការឆ្លងមេរោគកូរ៉ូណាប្រភេទថ្មី នៅពេលដែលពួកគេកំពុងបំពេញការងារ។

លោក Tony ដែលជាអ្នកគ្រប់គ្រងផ្នែកទីផ្សារ TNAOT APP នៃក្រុមហ៊ុនកោះថ្មី ថេកណឡូជី បានបញ្ជាក់ប្រាប់តំណាងក្លិបអ្នកកាសែតកម្ពុជាថា នេះគឺសន្តានចិត្តរបស់ក្រុមការងារសារព័ត៌មានរបស់លោក ដែលជាផ្នែកមួយនៃការចូលរួមជាមួយរដ្ឋាភិបាលកម្ពុជា ក្នុងការងារទប់ស្កាត់ការឆ្លងរាលដាលជំងឺកូវិដ១៩។

លោក ពុយ គា អគ្គលេខាធិការនៃក្លិបអ្នកកាសែតកម្ពុជា បានថ្លែងអំណរគុណចំពោះថ្នាក់ដឹកនាំសារព័ត៌មាន Tnaot App ដែលបានផ្តល់អំណោយដ៏សំខាន់ និងចាំបាច់ ដែលលោក ពុយ គា ហៅថា ជាជំនួយចំពេលវេលា សម្រាប់អ្នកសារព័ត៌មាន៕