លោក ប្រាយុទ្ធ នាយករដ្ឋមន្ត្រីថៃ មិនអនុញ្ញាតឱ្យលោក សម រង្ស៊ី ចូលទឹកដីថៃ
សារព័ត៌មាន Cambodia News/
ថៃ (៧ វិច្ឆិកា ២០១៩) ៖ តាមការចុះផ្សាយរបស់ទីភ្នាក់ងារព័ត៌មានរ៉យទ័រ បានអោយដឹងថា នាយករដ្ឋមន្ត្រីថៃ លោក ប្រាយុទ្ធ ចាន់អូចា បញ្ជាក់ថា មិនអាចអនុញ្ញាតឱ្យលោក សម រង្ស៊ី ឆ្លងកាត់ទឹកដីថៃទេ ដោយយោងលើទំនាក់ទំនងជាមួយកម្ពុជា និងគោលការណ៍អាស៊ានដែលមិនជ្រៀតជ្រែកកិច្ចការផ្ទៃក្នុងប្រទេសសមាជិកដទៃទៀត។
ការមិនអនុញ្ញាតឱ្យលោក សម រង្ស៊ី ចូលទឹកដីថៃ ក្រោយ លោក សម រង្ស៊ី បានដាក់លិខិតមួយស្នើទៅលោក ប្រាយុទ្ធ ចាន់អូចា កាលពីថ្ងៃទី៣១ ខែតុលា ឆ្នាំ២០១៩ដើម្បីចុះចតនៅទីក្រុងបាងកក រួចធ្វើដំណើរមកកាន់កម្ពុជាដោយសន្តិភាព ដើម្បីស្តារប្រជាធិបតេយ្យ។
នៅក្នុងសន្និសីទសារព័ត៌មាននៅថ្ងៃពុធ ទី៦ ខែវិច្ឆិកា ឆ្នាំ២០១៩ នៅទីក្រុងបាងកក លោក ប្រាយុទ្ធ ចាន់អូចា នាយករដ្ឋមន្ត្រីថៃ ថ្លែងដោយផ្អែកលើទំនាក់ទំនងជាមួយកម្ពុជា និងអនុវត្តន៍តាមគោលការណ៍អាស៊ាន។
លោក ប្រាយុទ្ធ ចាន់អូចា យោងទៅតាមការប្តេជ្ញារបស់យើងក្នុងនាមសមាជិកអាស៊ាន យើងមិនជ្រៀតជ្រែកកិច្ចការផ្ទៃក្នុងរបស់ប្រទេសសមាជិកដទៃ និងមិនអនុញ្ញាតឱ្យអ្នកណាមួយប្រើប្រាស់ទឹកដីថៃដើម្បីប្រឆាំងរដ្ឋាភិបាលណាមួយនោះទេ៕
