បុរសម្នាក់ត្រូវគេបោកលួចយកអស់ ៧០០.០០០ អឺរ៉ូ
ដំណឹង គួរឲ្យភ្ញាក់ផ្អើលនេះ បានក្លាយជាដំណឹងទី១ ផ្សាយព្រឹកមិញ ដោយ កាណាល់ទូរទស្សន៍រដ្ឋរុស្ស៊ី ប៉ុស្តលេខ១ ទាំងបញ្ជាក់ថា ក្នុងប្រវត្តិនៃការដូររូបិយវត្ថុបរទេស ដើម្បីយកលុយរូប្លរុស្ស៊ី នៅត្រង់កន្លែងដូរលុយ មិនដែលមានទឹកប្រាក់បាត់បង់ច្រើនយ៉ាងនេះឡើយ។ ឧប្បត្តិហេតុនេះ បានកើតឡើង រសៀលម្សិលមិញ ក្នុងក្រុងម៉ូស្គូ។
សាច់ រឿងគឺថា ក្រោយពីបើកពីធនាគារ បានលុយ ៧០ម៉ឺនអឺរ៉ូនោះមក សាម៉ីជន ដែលគេមិនបញ្ចេញឈ្មោះ បានរាវរកតាមបណ្តាញអ៊ិនធ័រណែត តើកន្លែងដូរណា ដែលឲ្យអត្រាដូរខ្ពស់ជាងគេ។ នៅទីបំផុត អាសយដ្ឋាននោះឯង ក៏មានរកឃើញបានដូចចិត្ត។ វាស្ថិតនៅតាមកូនវិថីមួយ នៃក្រុងម៉ូស្គូ។ ប៉ុន្តែកន្លែងដូរលុយនោះ ប្លែកខុសពីធម្មតា ដោយវា ឥតមានបំពាក់យីហោអ្វីណាទេ។ តាមដែលអ្នកឆ្លើយឆ្លងនៃកាណាល់ទូរទស្សន៍ ពណ៌នារៀបរាប់ កន្លែងដូរនេះមានលក្ខណៈពិសេស សម្រាប់បម្រើតែអតិថិជនណា ដែលដូរ ចាប់ពីកន្លះលានដុល្លារឡើងទៅ ពោលគឺចាប់ពី ៥០ម៉ឺនដុល្លារ។
អតិថិជនដែលស្ពាយលុយ ៧០ម៉ឺនអឺរ៉ូតាមខ្លួន ក៏បានចូលទៅដល់ កន្លែងដូរលុយនោះមែន ហើយក្រោយពីប្រគល់លុយ តាមប្រឡោះក្រោមកញ្ចក់បាញ់មិនធ្លុះ ទៅស្ត្រីបេឡាធិការិនីមក ស្ត្រីនោះក៏សុំឲ្យបុរសនោះ នៅរង់ចាំបន្តិចសិន ដ្បិតលុយនោះច្រើនណាស់ ហើយត្រូវចំណាយពេលខ្លះ ដើម្បីរាប់វា និងពិនិត្យមើល តើមានបង្កប់ទៅដោយក្រដាសប្រាក់ក្លែងក្លាយរឺទេ? បុរសអភ័ព្វនោះ ចេះតែចាំហើយចាំទៀត ចាំទាល់តែស្កក មិនឃើញស្ត្រីនោះត្រឡប់មកវិញសោះ ។ នៅទីបំផុត គាត់ក៏ឆោឡោ រត់ទៅប្តឹងប៉ូលីស។ ឥឡូវមហាផ្ទៃក្រុងម៉ូស្គូ ចង ក្រងជាសំណុំរឿងព្រហ្មទណ្ឌទៅហើយ ទាក់ទងនឹងឧក្រិដ្ឋកម្មឆបោកនោះ ដោយប្រកាសរកចាប់ខ្លួនស្ត្រីនោះ។
កាណាល់ទូរទស្សន៍រដ្ឋរុស្ស៊ី ដោយផ្សាយដំណឹងនេះ ទូន្មានប្រជាពលរដ្ឋ ឲ្យប្រុងប្រយ័ត្នជានិច្ច ហើយដូរលុយតែនៅកន្លែងណា ដែលមានផ្លាកសម្គាល់ត្រឹមត្រូវ។ យកល្អគឺដូរ នៅតាមកន្លែងដូរលុយ ដែលស្ថិតក្នុងធនាគាររដ្ឋ រឺធនាគារឯកជនធំៗ ទើបកក់ក្តៅជាង ទោះបីអត្រាដូរនៅទីនោះ មិនសូវជាខ្ពស់ក្តី។ តាមតួលេខដែលមាន មកទល់ឥឡូវ អតិថិជនធ្លាប់បាត់បង់អស់ដល់ ៦០ម៉ឺនអឺរ៉ូ ចំណែកទឹកប្រាក់ ៧០ម៉ឺនអឺរ៉ូ ដែលត្រូវគេបោក លួចយកលើកនេះ គឺច្រើនមិនធ្លាប់មានឡើយ។ ទឹកប្រាក់នេះ គិតតាមអត្រាសព្វថ្ងៃ គឺជាង ៩៣ម៉ឺនដុល្លារអាមេ រិកឯណោះ ដែលអាចទិញលំនៅដ្ឋានដ៏សមគួរ ក្នុងក្រុងម៉ូស្គូ បានយ៉ាង ហោចណាស់ ២លំនៅ៕ដោយ កែវ ឆាយា (RFI)