ក្រឡាប់រថយន្តនៅផ្លូវជាតិលេខ៤១បណ្តាលឲ្យកម្មករជិត២០នាក់របួសធ្ងន់ស្រាល
សារព័ត៌មាន Cambodia News/
កំពត (២ តុលា ២០១៩) ៖ កាលពីព្រឹកថ្ងៃទី២ ខែតុលា ឆ្នាំ២០១៩នេះ នៅលើកំណាត់ផ្លូវជាតិលេខ៤១ ស្ថិតក្នុងភូមិស្រែចែង ឃុំស្រែចែង ស្រុកជុំគិរី មានហេតុការណ៍រថយន្តបែកកង់រួចក្រឡាប់បណ្តាលអោយកម្មករប្រុសស្រីជិត២០នាក់ក្នុងចំណោមអ្នករួមដំណើរជាង៤០នាក់បានរងរបួសធ្ងន់ស្រាល។
គរបាលចរាចរណ៍ផ្លូវគោកនៃស្នងការដ្ឋានខេត្តកំពតបានប្រាប់ឱ្យដឹងថាកាលពីវេលាម៉ោង៥ និង៥០នាទីព្រឹកថ្ងៃទី២ ខែតុលាមានករណីគ្រោះថ្នាក់ចរាចរណ៍មួយបានកើតឡើងនៅលើដងផ្លូវជាតិលេខ៤១ ស្ថិតក្នុងភូមិស្រែចែង ឃុំស្រែចែង ស្រុកជុំគិរីដោយរថយន្តម៉ាកសាំយុង ពណ៌លឿង ពាក់ស្លាកលេខ ភ្នំពេញ 2AZ-1542 ផ្ទុះកង់រួចក្រឡាប់តែម្តង។ ក្នុងចំណោមអ្នកដំណើរ៤៣នាក់ដែលជាកម្មករ កម្មការិនីស្ថិតនៅលើរថយន្តនោះ មានប្រាំបួននាក់របួសធ្ងន់ និងប្រាំពីរនាក់រងរបួសស្រាល៕
