កិច្ចប្រជុំ កំពូល រវាងគណបក្សប្រជាជនកម្ពុជា និងគណបក្សសង្គ្រោះជាតិ
ភ្នំពេញ៖ ដូចតាមការគ្រោងទុក កិច្ចប្រជុំកំពូលរវាង គណបក្សប្រជាជនកម្ពុជានិងគណបក្សសង្គ្រោះជាតិ បានចាប់ផ្តើម កាលពីព្រឹកថ្ងៃទី១៦ កញ្ញា ២០១៣នេះ នៅមន្ទីររដ្ឋសភាជាតិ ក្នុងការដោះស្រាយជម្លោះរវាងគណបក្សនយោបាយទាំងពីរ។
។
សម្តេច ហ៊ុន សែន ដឹកនាំក្រុមចរចា ខាងគណបក្សប្រជាជនកម្ពុជា ហើយលោក សម រង្ស៊ី ដឹកនាំខាងក្រុមគណបក្សសង្គ្រោះជាតិ។ សមាសភាពនៃក្រុមចរចា មានចំនួន ៧ រូបម្ខាង។
ខាងគណបក្សប្រជាជនកម្ពុជា រួមមាន៖ សម្តេច ហ៊ុន សែន,លោក ស ខេង, លោកសាយ ឈុំ អង្គុយខាងមុខ និងឥស្សរជន ៤ រូបទៀត អង្គុយពីក្រោយ រួមមាន៖ លោក ឈាង វុន, លោក ប្រាក់ សុខុន, លោកសក់ សេដ្ឋា និងលោក សោម សឿន។
ចំណែកខាងគណបក្សសង្គ្រោះជាតិ មានលោក សម រង្ស៊ី ,លោក កឹម សុខា និងលោក ប៉ុល ហំម អង្គុយខាងមុខ រីឯឥស្សរជន ៤ រូបទៀត អង្គុយខាងក្រោយ រួមមាន លោក សុន ឆ័យ, លោកយឹម សុវណ្ណ, លោកអេង ឆៃអ៊ាង និងលោកគួយ ប៊ុនរឿន។
ជំនួបកំពូលនេះ គឺដើម្បីរិះរកដំណោះស្រាយរួមមួយ ដើម្បីឲ្យសម័យប្រជុំលើកដំបូង នៃរដ្ឋសភា អាចបើកដំណើរការបាន នៅថ្ងៃទី២៣ ខែកញ្ញា តាមការអញ្ជើញរបស់ព្រះមហាក្សត្រ។
មុនពេលកិច្ចប្រជុំ លោក សម រង្ស៊ី បាននិយាយថា ការប៉ះទង្គិចគ្នារវាងបាតុករ និងសមត្ថកិច្ច កាលពីយប់ថ្ងៃអាទិត្យម្សិលមិញ ដែលនាំឲ្យមានបាតុករម្នាក់ ស្លាប់ និងរបួសជាច្រើននាក់នោះ ក៏អាចនឹងលើកយកមកពិភាក្សានៅពេលនេះផងដែរ៕ Cambodia News
