កម្ពុជាព្រួយបារម្ភពីការទទួលស្គាល់កញ្ជាជាប្រភេទគ្រឿងញៀនស្របច្បាប់
សារព័ត៌មាន Cambodia News/
ភ្នំពេញ (០៩ ឧសភា ២០១៧) ៖ កម្ពុជាមានការព្រួយបារម្ភដែលប្រទេសមួយចំនួននៅក្នុងតំបន់បានទទួលស្គាល់កញ្ជាជាប្រភេទគ្រឿងញៀនស្របច្បាប់ដែលចំណុចនេះ គឺជាការព្រួយបារម្ភសម្រាប់តំបន់ ព្រោះថាស្ថានភាពភូមិសាស្ត្រតំបន់ មានលក្ខណៈអំណាយផលដល់ការដាំដុះដែលអាចនឹងបង្កឲ្យមានការកើនឡើងវិញនូវការប្រើប្រាស់ ហើយផ្តល់នូវផលប៉ះពាល់ធ្ងន់ធ្ងរដល់បញ្ហាសុខភាពរបស់ប្រជាពលរដ្ឋក្នុងតំបន់ទាំងមូល។
នេះបើតាមការបញ្ជាក់របស់លោកកៅ ខុនដារ៉ា អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន នៅក្នុងកិច្ចប្រជុំថ្នាក់មន្ត្រីជាន់ខ្ពស់ នៃប្រទេសចុះហត្ថលេខីអនុស្សារណៈការយោគយល់គ្នា ឆ្នាំ១៩៩៣ ស្តីពីការត្រួតពិនិត្យគ្រឿងញៀន ក្នុងមហាអនុតំបន់ទន្លេមេគង្គ កាលពីព្រឹកថ្ងៃទី០៨ ខែឧសភា ឆ្នាំ២០១៧ នៅសណ្ឋាគារ រ៉ាហ្វលឡឺរ៉ូយ៉ាល់ភ្នំពេញ៕
