ក្នុងកិច្ចប្រជុំពេញអង្គ គណៈរដ្ឋមន្ត្រីលើកយករបៀបវារៈ៤មកពិភាក្សា
សារព័ត៌មាន Cambodia News/
ភ្នំពេញ (៣០ សីហា ២០១៩) ៖ ក្នុងកិច្ចប្រជុំពេញអង្គរបស់ខ្លួន នៅវិមានសន្តិភាព ទីស្តីការនាយករដ្ឋមន្ត្រីនា ព្រឹកថ្ងៃទី ៣០ខែសីហានេះ សេចក្តីព្រាងច្បាប់ស្តីពីសំណង់ ត្រូវបានគណៈរដ្ឋមន្ត្រី លើកយកមកពិភាក្សារួមជាមួយ នឹងរបៀបវារ:មួយចំនួនទៀត។
កិច្ចប្រជុំពេញអង្គគណៈរដ្ឋមន្រ្តី នៅថ្ងៃនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញផ្តើម បើកកិច្ចប្រជុំថា របៀបវារៈនៃកិច្ចប្រជុំនៅថ្ងៃនេះមានដូចខាងក្រោម៖
១- សេចក្តីព្រាងច្បាប់ស្តីពីសំណង់។
២- សេចក្តីព្រាងឯកសារកម្មវិធីវិនិយោគសាធារណៈ៣ឆ្នាំរំកិល២០២០-២០២២។
៣- សេចក្តីព្រាងរបាយការណ៍ស្វ័យវាយតម្លៃស្តីពីការត្រួតពិនិត្យឡើងវិញនៃការអនុវត្តអនុសញ្ញាអង្គការសហប្រជាជាតិប្រឆាំងអំពើពុករលួយ(អ៊ុនកាក់, UNCAC) ជុំទី២នៅកម្ពុជា។
៤- បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តយល់ព្រមពីស្ថាប័ននីតិប្បញ្ញត្តិលើ៖
៤.១- កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
៤.២- ពិធីសារទី២ ស្តីពីការកំណត់ច្រកទ្វាព្រំដែនឆ្លងកាត់នៃកិច្ចព្រមព្រៀងក្របខណ្ឌអាស៊ានស្តីពីកិច្ចសម្របសម្រួលការដឹកជញ្ជូនឆ្លងកាត់ទំនិញ។
សូមបញ្ជាក់ថា សេចក្តី ព្រាងច្បាប់ស្តីពីសំណង់ ក៏ដូចជាបញ្ហាផ្សេងៗ ត្រូវបានគេមើលឃើញថា បញ្ហាសំណង់នៅមានការគ្រប់គ្រងមិនទាន់បាន ប្រសើរ ដែលនាំដល់ បញ្ហាមិន ល្អដូចជាកង្វះការធានាខុសត្រូវទៅលើគុណភាព សោភ័ណភាព និងរបៀបរៀបរយនៅក្នុងសង្គម៕
