លោក ជួន សុវណ្ណ បញ្ជាឲ្យតាមរកអ្នកពាក់ព័ន្ធវាយអ្នកបើករថយន្តបង្កគ្រោះថ្នាក់ចរាចរណ៍
សារព័ត៌មាន Cambodia News/
ភ្នំពេញ (១២ មីនា ២០១៨) ៖ អគ្គស្នងការរងនគរបាលជាតិនាយឧត្តមសេនីយ៍ ជួន សុវណ្ណ បានចេញបញ្ជាឲ្យសមត្ថកិច្ច ស្រាវជ្រាវរកអ្នកពាក់ព័ន្ធទាំងអស់ ដែលបានវាយប៉ងសម្លាប់ និងកម្ទេចរថយន្តជនរងគ្រោះ មកដាក់ទោសតាមច្បាប់ ក្នុងហេតុការណ៍គ្រោះថ្នាក់ចរាចរណ៍ នៅម្តុំមន្ទីរពេទ្យលោកសង្ឃ ដែលធ្វើឲ្យផ្អើលពេញប្រព័ន្ធ Facebook កាលពីរសៀលម្សិលមិញ ។
តាមលោក ជួន សុវណ្ណ បញ្ជាក់ថា ករណីគ្រោះថ្នាក់នេះ អ្នកបើកបរបង្កគ្រោះថ្នាក់ចរាចរណ៍ ដែលរត់គេចពីកន្លែងកើតហេតុ គឺច្បាប់ជាអ្នកអនុវត្ត ប៉ុន្តែចំពោះអ្នកដែលវាយអ្នកបើកបរ ក៏ត្រូវតែទទួលទោសផងដែរ ព្រោះវាជាអំពើអសីលធម៌ក្នុងសង្គម និងមិនគួរឲ្យមានកើតឡើងក្នុងរូបភាពបែបនេះទៀត ។
សូមជម្រាបថា កាលពីម្សិលមិញ ប្រជាពលរដ្ឋបានតាមដេញវាយប៉ុនប៉ងសម្លាប់អ្នកបើកបរ និងវាយកម្ទេចរថយន្តទំនើបមួយគ្រឿង ក្រោយបើកបុករះតាមផ្លូវពីម្តុំទួលសង្កែ ខណ្ឌឬស្សកែវ ហើយបើករត់គេចរហូតដល់ម្តុំពេទ្យលោកសង្ឃ ខណ្ឌទួលគោក ។
សូមជម្រាបថា បុរសដែលបើករថយន្តបង្កគ្រោះថ្នាក់ចរាចរណ៍ បុករះជាបន្តបន្ទាប់តាមដងផ្លូវ ចាប់ពីម្តុំទួលសង្កែ ខណ្ឌប្ញស្សីកែវ រហូតដល់ម្តុំមន្ទីរពេទ្យលោកសង្ឃ ហើយត្រូវបានប្រជាពលរដ្ឋ តាមវាយប៉ងសម្លាប់ និងបំផ្លាញរថយន្តនារសៀលថ្ងៃទី១១ ខែមីនា ឆ្នាំ២០១៨ម្សិលមិញនោះ មានឈ្មោះ បណ្ឌិត ស៊ុយ សារ៉េត គឺជាសាស្ត្រាចារ្យបង្រៀននៅសាកលវិទ្យាល័យកម្ពុជា។
សមត្ថកិច្ចបញ្ជាក់ថា លោកសាស្ត្រាចារ្យ ស៊ុយ សារ៉េត មានកូន២នាក់ ប្រុសម្នាក់ និងស្រីម្នាក់ ហើយបន្ទាប់ពីពិនិត្យឃើញស្ថានភាពជំងឺធ្ងន់ធ្ងរ លោកត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យប្រទេសវៀតណាម តាំងតែពីយប់មិញ មិនទាន់មានបញ្ហាដល់អាយុជីវិតទេ ៕
