សៀវភៅចេញថ្មីនិយាយពី ហ៊ុន ម៉ាណែត ហ៊ុន ម៉ានិត និង ហ៊ុន ម៉ានី

ភ្នំពេញ (៥ ធ្នូ ២០១៨)៖ សៀវភៅ​ដែលមានចំណងជើងថា “បងប្អូនប្រុសទាំង៣ – ឈាមថ្មីក្នុងចំណោម​អ្នកបន្ត​វេន” ដែលរៀបរាប់ពីប្រវត្តិកូនប្រុសទាំង៣របស់​សម្តេចតេជោ ហ៊ុន សែន និងសម្តេចកត្តិព្រឹទ្ធ​បណ្ឌិត ប៊ុន រ៉ានី ត្រូវបានចេញផ្សាយជាសាធារណៈនៅព្រឹកថ្ងៃពុធទី៥ ធ្នូ នេះ។

ថ្លែងប្រាប់អ្នកសារព័ត៌មាននៅក្នុងសន្និសីទសារព័ត៌មាន លោក ឆាយ សុផល សាស្រ្តាចារ្យ​ព័ត៌​មាន និងជាអ្នកនិពន្ធសៀវភៅបាននិយាយថា លោកបានចំណាយ​ពេល៥ឆ្នាំសម្រាប់រៀបចំចងក្រងសៀវភៅនេះឡើង ដោយលោកបានកត់ត្រាទុកពីសកម្មភាព និង​​សម្តីរបស់បងប្អូនទាំង៣គឺ ហ៊ុន ម៉ាណែត ហ៊ុន និត និង ហ៊ុន ម៉ានី ព្រមទាំងបានជួបសម្ភាសន៍ផ្ទាល់ជា​មួយឥស្សរជនដឹកនាំវ័យក្មេងទាំង៣រូបផងដរ។

នៅពេលសួរថា ​តើក្នុងចំណោមបងប្អូនប្រុសទាំង៣ ម្នាក់ណានឹងអាចក្លាយជានាយក​រដ្ឋមន្រ្តី​នៅ​ពេល​ពេល​អនាគត លោក សុផល ថា អ្នកទាំងបី ក៏ដូចជាអ្នកផ្សេងទៀតមានសក្តានុពលម្យ៉ាងម្នាក់ ហើយថា សាធារ​ណជនមើលឃើញថា អ្នកទាំង៣គឺ​សុទ្ធតែ​​បាន​​សិក្សាមានកម្រិត​ខ្ពស់នៅ​បណ្តា​ប្រទេស​មហា​អំណាច ពិសេស​​គឺ​សហរដ្ឋអាម៉េរិក ដែលជាឈាមថ្មីអាចមាន​សមត្ថភាព​គ្រប់​​គ្រាន់​​ក្នុង​ការបន្តវេនដឹកនាំ ទាំង​នៅក្នុងបក្ស និងក្នុងរដ្ឋាភិបាល ក៏ដូចជានៅក្នុងស្ថាប័ននីតិ​ប្បញ្ញត្តិ​ផងដែរ។

លោក​បន្តថា បើទៅជាសៀវភៅនេះមិនអាចរៀបរាប់ពីប្រវត្តិនិងសកម្មភាពបានទាំងអស់របស់ឥស្ស​រជន​នយោបាយវ័យក្មេងទាំង៣រូបបានអស់ក៏ដោយ ក៏យ៉ាងហោចណាស់ សៀវភៅអាចជួយបានខ្លះ ក្នុងការ​យល់​ដឹង​បន្ថែមពីគំនិត ឥរិយាបថ និងសកម្មភាពរបស់ពួក​គេ ដែលប្រសូត​មក​មាន​ពុក​ជាមេដឹក​នាំ​កំពូល​នៃប្រទេស។
លោក ឆាយ សុផល បាន​លើកឡើងថា “មូលហេតុដែលខ្ញុំចងក្រងសៀវភៅនេះ គឺខ្ញុំ​ចង់បង្ហាញ​មិត្ត​អ្នក​អាន​ឲ្យបានដឹង​កាន់តែច្បាស់ពីសាវតារនៃបងប្អូនប្រុសទាំង៣ ក្នុងនាមខ្លួនជាកូនរបស់​មេដឹកនាំកំពូល​របស់ប្រទេស។ ចំណែកឯ​បង​ប្អូនស្រី២រូបទៀត​ក៏ត្រូវ​បាន​រៀប​រាប់​ដោយ​សង្ខេប​នៅ​ក្នុង​សៀវភៅ​នេះ​ដែរ”។

នៅចពោះមុខអ្នកសារព័ត៌មាន លោក សុផល បានដាក់សំណួរជាច្រើនរួមមាន៖

• តើបងប្អូនប្រុសទាំង៣មានអារម្មណ៍បែបណា នៅពេលគេជេរប្រមាថពុកម៉ែរបស់ខ្លួន?
• តើបងប្អូនប្រុសទាំង៣ចាំបណ្តាំពុកម៉ែអ្វីខ្លះ?
• តើបងប្អូនប្រុសទាំង៣រៀនបានអ្វីខ្លះពីពុករបស់ខ្លួន?
• តើបងប្អូនប្រុសទាំង៣យកចំណេះអ្វីខ្លះពីបរទេសមកអនុវត្តនៅក្នុងប្រទេសរបស់ខ្លួន?
• តើបងប្អូនប្រុសទាំង៣ចង់ស្នងតំណែងរបស់ពុកជានាយករដ្ឋមន្រ្តីដែរឬទេ?
• តើបងប្អូនប្រុសទាំង៣ធ្វើការត្រូវនឹងចំណង់ចំណូលចិត្តរបស់ខ្លួនដែរឬអត់?
• តើបងប្អូនប្រុសទាំង៣ជួបស្នេហាគ្រាដំបូងនៅទីណា និងនៅពេលណាដែរ?
• តើភរិយាៗរបស់បងប្អូនប្រុសទាំង៣ជានរណា?
• តើបងប្អូនប្រុសទាំង៣មានចំណង់ចំណូលចិត្តបែបណាក្នុងជីវិត?
• តើបងប្អូនប្រុសទាំង៣មានជីវិតអតីតកាលបែបណាខ្លះ?
• តើបងប្អូនប្រុសទាំង៣មានទស្សនៈដូចម្តេចចំពោះប្រទេសជាតិ?
• តើបងប្អូនប្រុសទាំង៣មានសារអ្វីខ្លះសម្រាប់យុវជនជំនាន់ថ្មី?
• តើបងប្អូនប្រុសទាំង៣មានសកម្មភាពអ្វីខ្លះនៅក្នុងសង្គម?

យ៉ាងណាក៏ដោយ លោក សុផល មិន​បានផ្តល់ចម្លើយនោះទេ ​ដោយគ្រាន់តែប្រាប់ថា “ចម្លើយនៃសំណួរ​​ទាំងនេះ រួមផ្សំនិងបញ្ហាជាច្រើនទៀត មាននៅក្នុងសៀវភៅ។

សូមបញ្ជាក់ថា សៀវភៅ “បងប្អូនប្រុសទាំង៣ – ឈាមថ្មីក្នុងចំណោមអ្នកបន្តវេន” គឺជាសៀវភៅទី៩ ហើយ ដែលលោក ឆាយ សុផល បានចងក្រង ខណៈលោកកំពុងមានគម្រោងបីបួនក្បាលទៀត។
លោក ឆាយ សុផល បញ្ជាកថា “ទាន់កម្លាំងកាយនិងប្រាជ្ញានៅមាន ត្រូវតែខិត​ខំចង​ក្រង​ពីអ្វី​ដែល​ជា​ប្រយោជន៍​សម្រាប់អ្នកអានទាំងពេលបច្ចុប្បន្ន និងអនាគត” ហើយថា “សៀវភៅមួយ​ក្បាល​ពិតជា​មិន​អាច​​រៀបរាប់អស់នោះទេ។

លោកថា “ប្រសិនបើអ្នកនិពន្ធណា ឬបុគ្គលណាឃើញថា មានចន្លោះប្រហោង នោះខ្លួនអាច​សរសេរបន្ថែមទៅតាមការយល់ដឹងរបស់ខ្លួន។ កិច្ចការរបស់អ្នកសរសរសៀវភៅ មិន​ខុសពី​ចុង​ភៅ​ឡើយ ព្រោះសម្លមួយឆ្នាំងមិនអាចតម្រូវមាត់មនុស្សរាប់សិបអ្នកឡើយ”។
សៀវភៅ​​ដែលមានចំណងជើងថា “បងប្អូនប្រុសទាំង៣ – ឈាមថ្មីក្នុងចំណោមអ្នកបន្ត” អាចរកបាន​នៅ​តាម​​បណ្ណាគារ​ធំៗ និងតូបកាសែតមួយចំនួននៅទូទាំងប្រទេស ព្រមទាំងនៅ Monument Book នៅផ្សារទំនើប អ៊ីអ័ន អាកាសយានដ្ឋានអន្តរជាតិភ្នំពេញ និងសៀមរាប៕