រួមគ្នាបញ្ចប់របេងចំពោះកុមារ
ដោយ ឆាយ សុផល
Cambodia News
ភ្នំពេញ (២៣ កញ្ញា ២០១៨)៖ មេដឹកនាំនិងសកម្មជនផ្នែកសុខភាពជាច្រើន រួមទាំងអ្នកទទួលរងការប៉ះពាល់បញ្ហារបេងផងបានរួសរាន់ទៅបូរីញីវយ៉ក ដើម្បីពិភាក្សាគ្នានៅសប្តាហ៍ក្រោយនេះពីវិធីបញ្ចប់ជំងឺរបេងកុំឲ្យកើតមាននៅក្នុងចំណោមកុមារ។
ការពិភាក្សាដែលចាប់ផ្តើមនៅថ្ងៃចន្ទនេះ ធ្វើឡើងនៅឯកិច្ចប្រជុំកំពូលលើកដំបូងស្តីពីរបេងនាទីស្នាក់ការអង្គការសហប្រជាជាតិ ហើយក៏ជាការពិភាក្សាដែលធ្វើឡើងនៅមុនពេលមហាសន្និបាតអង្គការសហប្រជាជាតិលើកទី៧៣ដែរ។
កិច្ចប្រជុំកម្រិតខ្ពស់លើកដំបូងរបស់អង្គការសហប្រជាជាតិស្តីពីជំងឺរបេងដែលនឹងត្រូវបានរៀបចំឡើងនៅទីស្នាក់ការអង្គការសហប្រជាជាតិនៅថ្ងៃទី២៤-២៧ កញ្ញា នេះមានបំណងទទូចឲ្យរដ្ឋជាសមាជិកអង្គការសហប្រជាជាតិមានឆន្ទៈនិងការប្តេជ្ញាចិត្តផ្នែកនយោបាយក្នុងការប្រយុទ្ធលុបបំបាត់ជំងឺរបេងនៅឆ្នាំ២០៣០។
នៅឯកិច្ចប្រជុំនោះ មេដឹកនាំ និងអ្នកទទួលរងការប៉ះពាល់ពីរបេងនឹងពិភាក្សាគ្នាពីសារៈសំខាន់នៃការប្តេជ្ញាចិត្តដោយផ្តោតលើកុមារនិងមនុស្សពេញវ័យជាគោលដៅ ក្នុងការឆ្លើយតបចំពោះបញ្ហារបេង ព្រមទាំងដាក់ចេញនូវផែនទីបង្ហាញផ្លូវឆ្នាំ២០១៨ នៃការងាររបេងសម្រាប់បង្ការកុមារនិងមនុស្សពេញវ័យ។
បើតាមការឲ្យដឹងពីអង្គការសុខភាពពិភពលោកបានបញ្ជាក់ថា ជារៀងរាល់ថ្ងៃ មានកុមារស្ទើរតែ៧០០នាក់បានស្លាប់ដោយសាររបេង ដោយ៨០%នៃការស្លាប់នេះគឺកើតមាននៅមុនអាយុ៥ឆ្នាំហើយកុមារជាង២៥០.០០០នាក់កំពុងឆ្លងរោគរបេង។
ដើម្បីបញ្ឈប់របេងនៅក្នុងចំណោមកុមារ ការបង្ការគឺត្រូវការជាចាំបាច់ ដោយអង្គការសុខភាពពិភពលោកផ្តល់យោបល់ថា “ការធ្វើរោគវិច្ឆ័យ និងការព្យាបាលប្រកបដោយជោគ ជ័យដល់មនុស្សពេញវ័យដែលមានជំងឺរបេងគឺជាវិធីសាស្រ្តដ៏ល្អបំផុត ដើម្បីបញ្ចៀសកុមារកុំឲ្យឆ្លងមេរោគរបេង”។
អង្គការសុខភាពពិភពលោកក៏បានបញ្ជាក់ដែរថា កម្មវិធីត្រួតពិនិត្យដ៏ល្អមួយ ដែលនឹងធានាដល់ការធ្វើរោគវិនិច្ឆ័យ និងព្យាបាលមនុស្សពេញវ័យដែលមានរបេងគឺជាមធ្យោបាយមួយ ដើម្បីបង្ការកុមារកុំឲ្យឆ្លងរបេង ហើយការចាក់ថ្នាំបង្ការទារកពេលកើតមកភ្លាមរហូតអាយុ២ឆ្នាំ នឹងជួយបង្ការពួកគេមិនឲ្យមានការវិវត្តធ្ងន់ធ្ងរទៅរកជំងឺរបេងដែរ។
បើតាមសេចក្តីបង្ហាញរបស់មហាសន្និបាតអង្គការសហប្រជាជាតិឆ្នាំ២០១៨បានសរសេរថា ការប្តេជ្ញាចិត្ត និងការសហការជាពហុវិស័យនៅជុំវិញពិភពលោកពិតជាមានសារៈសំខាន់បំផុត ដើម្បីធានាថា ការធ្វើអន្តរាគមន៍ដាច់ដោយឡែកសម្រាប់កុមារចំពោះបញ្ហារបេងដែលមានស្រាប់នៅតែមានជាសាកល ហើយថា ការស្រាវជ្រាវដើម្បីឲ្យមានគំនិតសុទិដ្ឋិនិយមចំពោះមធ្យោបាយដែលមានស្រាប់ និងការរៀបចំឲ្យមានការធ្វើតេស្ត ការព្យាបាល និងការធ្វើអន្តរាគមន៍ផ្សេងៗទៀតដល់កុមារត្រូវទទួលបានការគាំទ្រ។
ការិយាល័យអង្គការសហប្រជាជាតិទទួលបន្ទុកសេវាគម្រោងហៅកាត់ថា UNOPS អង្កការ UNICEF អង្គការសុខភាពពិភពលោក អង្គការដៃគូបញ្ឈប់របេង និងដៃគួរបស់ពួកគេបានទទូចឲ្យមេដឹកនាំ និងអ្នករៀបចំគោលនយោបាយ និងនិងអ្នកធ្វើការសម្រចចិត្តផ្នែកនយោបាយចូលរួមជាមួយពួកគេ ដើម្បីបង្ហាញពីការប្តេជ្ញាចិត្ត និងចាត់វិធានការណ៍ចំពោះការបញ្ចប់របេងនៅក្នុងចំណោមកុមារ យុវជន និងក្រុមគ្រយសារ៕
