សម្ដេចតេជោ អំពាវនាវឲ្យប្រជាពលរដ្ឋ នាំគ្នាទៅបោះឆ្នោត ដើម្បីពង្រឹងលទ្ធិប្រជាធិបតេយ្យនៅកម្ពុជា
សារព័ត៌មាន Cambodia News/
ភ្នំពេញ (២០ កក្កដា ២០១៨) ៖ តាមទំព័រ Facebook ផ្លូវការ របស់សម្តេចតេជោ ហ៊ុន សែន នៅថ្ងៃទី១៩ ខែកក្កដា បានសរសេរថា «សុខសប្បាយជាទេ បងប្អូនជនរួមជាតិទូទាំងប្រទេស? នៅសល់តែ១០ ថ្ងៃទៀតប៉ុណ្ណោះ ថ្ងៃបោះឆ្នោតជាតិ ជាប្រវត្តិសាស្រ្ត នឹងមកដល់ហើយ! នៅថ្ងៃនោះ គឺបងប្អូនប្រជាពលរដ្ឋ នឹងប្រើប្រាស់សិទ្ធិសេរីភាព សម្រេចជោគវាសនាប្រទេសជាតិ តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌»។
សម្តេចតេជោ ហ៊ុន សែន បានបញ្ជាក់ទៀតថា «យើងទៅបោះឆ្នោតទាំងអស់គ្នា ដើម្បីពង្រឹងលទ្ធិប្រជាធិបតេយ្យ នៅក្នុងប្រទេសឲ្យកាន់តែរឹងមាំ…ព្រោះថា បើគ្មានការបោះឆ្នោតទេ គឺគ្មានការរីកចម្រើនឡើយ»។
ជាមួយគ្នានោះ នាយករដ្ឋមន្ដ្រីនៃកម្ពុជា ក៏បានអរគុណ ដល់បងប្អូនជនរួមជាតិ ដែលមានជំនឿទុកចិត្តលើការដឹកនាំរបស់សម្តេចដែលបានធ្វើឲ្យកម្ពុជា មានសុខសន្តិភាពពេញលេញ និងរីកចម្រើន ដែលបងប្អូនបានឃើញកម្ពុជាពិតសព្វថ្ងៃនេះ។
សម្ដេចតេជោ ហ៊ុន សែន ក៏សូមអំពាវនាវឲ្យក្មួយៗយុវជន និងបងប្អូនជនរួមជាតិ បោះឆ្នោតឲ្យគណបក្សប្រជាជនកម្ពុជា លេខរៀងទី២០ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ៕
