សម្តេច ហ៊ុន សែន បញ្ជាឲ្យចាប់វាយខ្នោះអ្នកនយោបាយដែលសន្យាលុបបំណុលរបស់ពលរដ្ឋ
សារព័ត៌មាន Cambodia News/
ភ្នំពេញ (០៩ កុម្ភៈ ២០១៧) ៖ សម្តេចនាយករដ្ឋមន្រ្តី ហ៊ុន សែន នៅព្រឹកថ្ងៃអង្គារម្សិលមិញ បានព្រមានជាថ្មី ដោយបញ្ជាឲ្យអាជ្ញាធរចាប់វាយខ្នោះអ្នកនយោបាយណាដែលឃោសនា ថានឹងលុបបំណុលឲ្យប្រជាពលរដ្ឋដែលខ្ចីលុយពីគ្រឹះស្ថានមីក្រូហិរញ្ញវត្ថុ នៅពេលដែលពួកគេឈ្នះឆ្នោត។
នេះមិនមែនជាលើកទីមួយទេ ដែលសម្តេចតេជោ ហ៊ុន សែន ប្រកាសបញ្ជាឲ្យចាប់ខ្លួនអ្នកនយោបាយដែលសន្យាថា នឹងលុបបំណុលឲ្យប្រជាពលរដ្ឋ។ ចាប់តាំងពីការប្រកាសកាលពីដើមឆ្នាំ២០១៦មក គេមិនទាន់ឃើញមានអ្នកនយោបាយណាម្នាក់ត្រូវបានចាប់ខ្លួនពាក់ព័ន្ធនឹងការសន្យានេះនៅឡើយ។
ក្នុងពិធីបញ្ចុះខណ្ឌសីមា ពុទ្ធាភិសេក និងឆ្លងសមិទ្ធិផលក្នុងវត្តព្រែកប្រា ខណ្ឌច្បារអំពៅ ក្នុងរាជធានីភ្នំពេញ សម្តេច ហ៊ុន សែន បានចំអកឲ្យគណបក្សមួយចំនួនដែលបានឃោសនានយោបាយតាមរយៈការសន្យាថា នឹងលុបបំណុលដែលប្រជាពលរដ្ឋតាមមូលដ្ឋានជំពាក់គ្រឹះស្ថានមីក្រូហិរញ្ញវត្ថុឯកជនថា ជាការបោកប្រាស់។
សម្តេចបាន លើកឡើងថា គ្រឹះស្ថានមីក្រូហិរញ្ញវត្ថុជារបស់ឯកជន មិនមែនជារបស់រដ្ឋនោះទេ ដូច្នេះអ្នកនយោបាយដែលសន្យាថា លុបចោលបំណុលទាំងនោះបាន លុះត្រាតែពួកគេធ្វើបដិវត្ត បង្កើតរបបថ្មី ដែលលោកបានប្រៀបរបបថ្មីនោះ ដូចទៅនឹងរបប ប៉ុល ពត។ សម្តេចបានបញ្ជាឲ្យអាជ្ញាធរចាប់ខ្លួនបុគ្គលណាដែលហ៊ានឃោសនាដោយសន្យាលុបចោលបំណុលទាំងនោះ៕
