គ.ជ.ប. នឹងត្រួតពិនិត្យ ផ្ទៀងផ្ទាត់ និងបូកសរុបលទ្ធផលបោះឆ្នោត ចាប់ពីរសៀលថ្ងៃទី៤សីហាត
សារព័ត៌មាន Cambodia News/
រាជធានីភ្នំពេញ (០៣ សីហា ២០១៨) ៖ ចាប់ពីថ្ងៃសៅរ៍ ទី៤ ខែសីហា ឆ្នាំ២០១៨ វេលាម៉ោង ២ រសៀល គណៈកម្មាធិការជាតិរៀបចំការបោះឆ្នោត ឬគ.ជ.ប. នឹងធ្វើការត្រួតពិនិត្យ ផ្ទៀងផ្ទាត់ និងបូកសរុបលទ្ធផល នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដោយចាត់តាំងក្រុមការងារ ៤ ក្រុមធំៗ។
សេចក្តីប្រកាសរបស់គ.ជ.ប. ចុះថ្ងៃទី៣ ខែសីហាបានបង្ហាញថា ការត្រួតពិនិត្យ ផ្ទៀងផ្ទាត់នេះ ត្រូវបានចាត់តាំងជាបួនក្រុមធំៗ រួមមាន៖ -ក្រុមសម្រួលថ្នាក់កណ្តាល ,ក្រុមទទួលសម្ភារៈ ឯកសារបោះឆ្នោត ,ក្រុមកំណត់បែងចែកអាសនៈ និងក្រុមត្រួតពិនិត្យលទ្ធផលឡើងវិញ។
គ.ជ.ប. ក៏បានប្រកាសថា ដោយឡែក ក្រុមត្រួតពិនិត្យឡើងវិញ ត្រូវបានបែងចែកជា ប្រាំក្រុមតូចទៀត ដើម្បីជួយបំពេញការងារឲ្យកាន់តែមានប្រសិទ្ធភាព។
ជាមួយគ្នានេះ គ.ជ.ប. បានប្រកាសអញ្ជើញប្រព័ន្ធផ្សព្វផ្សាយព័ត៌មានជាតិ និងអន្តរជាតិ ចូលរួមយកព័ត៌មានក្នុងព្រឹត្តិការណ៍នៃការត្រួតពិនិត្យ ផ្ទៀងផ្ទាត់ និងបូកសរុបលទ្ធផល នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងចាប់ផ្តើមពីម៉ោង ២ រសៀល ថ្ងៃទី៤ ខែសីហាតទៅ៕
