រថយន្តបើកបុក របួសធ្ងន់ ៣នាក់ ហើយគេចបាត់
ភ្នំពេញ៖ កាលពីវេលាម៉ោង១ និង២០ នាទី រំលងអធ្រាត្រឈានចូលថ្ងៃទី៨ កុម្ភៈ មនុស្ស៣នាក់បានទទួលរងរបួសធ្ងន់ ដោយសារគ្រោះថ្នាក់ចរាចរណ៍ ពេលកំពុងជិះម៉ូតូ ហើយបានត្រូវរថយន្តមួយគ្រឿងបើកបុក នៅចំណុចស្តុបផ្សារដីហុយ តាមមហាវិថីសហព័ន្ធរុស្ស៊ី កែងន័រប្រ៊ីដ ស្ថិតក្នុងភូមិ ១០០ខ្នង សង្កាត់ទឹកថ្លា ខណ្ឌសែនសុខ
ប្រភពព័ត៌មានបានឲ្យដឹងថា រថយន្តកូរ៉េ បើកតាមផ្លូវនរប្រ៊ីដ ពីជើងទៅត្បូង។ ចំណែកម៉ូតូវីវ៉ា ពណ៌ខ្មៅ ជិះគ្នា៣នាក់ តាមមហាវិថីសហព័ន្ធរុស្ស៊ី ពីលិចទៅកើត ខណៈមកដល់ចំណុចស្តុប ផ្សារដីហុយ ស្រាប់តែរថយន្តបុកម៉ូតូ បណ្តាលឲ្យដួលរងរបួសធ្ងន់ទាំង ៣នាក់ ហើយរថយន្តរត់គេចបាត់ សូម្បីតែប៉ូលិសជិះម៉ូតូដេញតាមក៏តាមមិនទាន់ដែរ។
ក្រោយពេល កើតហេតុ ជនរងគ្រោះ ត្រូវបានបញ្ជូនទៅព្យាបាលនៅគ្លីនិកឯកជន។ ចំណែកម៉ូតូជនរងគ្រោះ ត្រូវសមត្ថកិច្ចយកទៅរក្សាទុក នៅខណ្ឌសែនសុខ៕
ដោយ៖ ហេង នាង