បាញ់កាំភ្លើងធំជាច្រើនគ្រាប់ ក្នុងព្រះរាជពិធីដង្ហែ និងតម្កល់ព្រះបរមអដ្ឋិ
សារព័ត៌មាន Cambodia News/
ភ្នំពេញ (១១ កក្កដា ២០១៤) ៖ ស្នូរកាំភ្លើងធំ១០៥មីលីម៉ែត្រ បានលឺយ៉ាងកងរំពង នៅលើអាកាសវាហា នាព្រឹកព្រលឹម ថ្ងៃទី១១ ខែកក្កដា ដែលជាថ្ងៃទី០២ នៃព្រះរាជពិធីដង្ហែ និងតម្កល់ព្រះបរមអដ្ឋិ ព្រះបរមរតនកោដ្ឋ ព្រះករុណា ព្រះបាទសម្ដេចព្រះ នរោត្ដសីហនុ។
កងកម្លាំងទាហាន របស់កងយោធពលខេមរភូមិន្ទ បានបាញ់កាំភ្លើងធំ១០៥មីលីម៉ែត្រ ចំនួន១០១ណាត់ នៅវេលាម៉ោងប្រមាណជា០៧ និង២០នាទីព្រឹក ក្រោមវត្ដមានមន្ដ្រីជាន់ខ្ពស់ ក្រសួងការពារជាតិជាច្រើនរូប ស្របពេលមានការដង្ហែព្រះបរមអដ្ឋិ ចេញព្រះបរមរាជវាំង ហើយការបាញ់នេះ បានប្រព្រឹត្តទៅ ដោយទទួលជោគជ័យ។
បើយោងតាម សេចក្ដីជូនដំណឹង របស់គណៈកម្មាធិការជាតិរៀបចំបុណ្យជាតិ-អន្តរជាតិ បានឲ្យដឹង ថា នៅថ្ងៃទី១២ ខែកក្កដា ដែលជាថ្ងៃទី០៣ ព្រះរាជពិធីដង្ហែ និងតម្កល់ព្រះបរមអដ្ឋិ ព្រះបរមរតនកោដ្ឋ វេលាម៉ោង៧ព្រឹក ពេលតម្កល់ព្រះកោដ្ឋព្រះបរមអដ្ឋិ ក្នុងព្រះចេតិយ ក៏មាន ការបាញ់កាំភ្លើងធំ១០១ណាត់ជាលើកទី២ផងដែរ។
គួររម្លឹកដែរ ថា ក្នុងព្រះរាជពិធីដង្ហែ និងថ្វាយព្រះភ្លើងព្រះបរមសព ព្រះបមររតនកោដ្ឋ សម្តេចព្រះនរោត្តម សីហនុ ក៏មានការបាញ់កាំភ្លើងធំ១០១ណាត់ចំនួន៣លើកផងដែរ គឺលើកទី០១បានប្រព្រឹត្តទៅនៅថ្ងៃទី០១ ខែកុម្ភៈ ឆ្នាំ២០១៣ នៅពេលដែលព្រះបរមសព ត្រូវដង្ហែចេញពីព្រះបរមរាជវាំង លើកទី០២ ប្រព្រឹត្តទៅនៅពេលដែលព្រះបរមសព ដង្ហែដល់ទីលានវាលព្រះមេរុ។ និងការបាញ់លើកទី០៣ បានប្រព្រឹត្តទៅនៅថ្ងៃទី០៤ ខែកុម្ភៈ ឆ្នាំ២០១៣ នៅពេលប្រារព្ធព្រះរាជពិធីថ្វាយព្រះភ្លើង៕
